Konsehal Alcover nasubo sa resulta sa eleksiyon

CEBU, Philippines — Gipadayag ni Konsehal Pastor “Jun” Alcover Jr. ang iyang kasubo tungod kay namatay na ang demokrasya sa nasud tungod kay nagkabati, nagkagrabe ug nagkahugaw na ang kultura sa eleksyon sa nasud tungod sa nagkadaghan nga alegasyon sa vote-buying ug uban pa nga dili angay nga mga lakang panahon sa piniliay.

“Dakong sagpa alang sa atong demokrasya nga mura og gihimo nalang nga pista, dili na seryoso ang katawhan sa pagpili sa tinuoray unta nga moserbisyo sa atong gobyerno. Mura og nawala na ang tinuod nga mithi ug adboksiya sa demoktratikong proseso”, unod sa privilege speech ni Alcover.

Gikasagmuyo sab niya ang iyang mabasahan sa social media sama sa “Wala pa’y kamang diha, Kapitan?”, “Kanus-a man mi kamangon diri?”, “Naa man unta mi sa listahan, Kap, asa naman?”

Nakita ni Alcover nga dili na tingog sa demokrasya ang iyang makita ug madungog sa social media.

Nasayran sab niya adunay mopadala og personal nga mga mensahe sa mga kandidato nga mohangyo pa nga magpabayad sa ilang mga boto kung mahatagan sa gitawag nga ‘kamang’.

Nagkanayon si Alcover nga kinahanglan nga motabang ang mga politiko aron nga dili na mapadayon ang maong vote-buying nga usa sa mga rason nganong wala na modaog ang mga politiko nga adunay maayo nga tinguha ug intensyon alang sa kaayuhan sa mga Sugbuanon.

Tuod man, mapasalamaton si Alcover sa suporta ug sa laing higayon nga makapangalagad isip kabahin sa konseho. Apan dili gyud niya mapugngan ang iyang kaguol nga adunay mga kauban niya sa konseho nga dili mapakadayon sa pagpanerbisyo.

Taliwala niini, matud pa ni Alcover nga ang pagpanerbisyo sa katawhan magpabilin bisan pa man og anaa ug mawala na sa posisyon. (BANAT NEWS)