Tabang alang sa Negros Island giandam na sa DSWD
CEBU, Philippines — Andam ang Department of Social Welfare and Development Field Office 7 – Central Visayas sa paghatag og suporta ug tabang sa Negros Island Region (NIR) isip tubag sa bag-o lang nga pagbuto sa Mt. Kanlaon niadtong Mayo 13, 2025.
Si DSWD-7 Regional Director Shalaine Marie S. Lucero, CESO III, nipaambit nga ang ahensya adunay prepositioned food ug non-food items sa Canlaon City ug kasikbit nga mga lungsod niini.
Ang DSWD-7 nagkanayon nga pipila ka bulan sa wala pa ang pagbuto sa bulkan niadtong Mayo 13, ang ilang ahensya, pinaagi sa Disaster Response Management Division (DRMD), niseguro sa pagbutang og 38,383 ka mga FFP sa tibuok Negros Oriental nga nikantidad og P24,636,754.00 aron mahatagan dayon og tabang ang mga apektadong pamilya.
Niadtong Mayo 13, ang mga prepositioned FFPs gipang-apod-apod sa 10 ka mga siyudad diin ang Ayungon nakadawat og 15,103; Bais City nga adunay 500; Bindoy nga may 1,400; Canlaon City nga adunay 3,914; Guihulngan City nga 3,184; Mabinay nga 1,546; San Jose nga may 800; Santa Catalina nga adunay 1,226; Tayasan nga adunay 1,850 ug katapusan; Vallehermoso nga adunay 4,630.
Ang DSWD aduna usab P2,000,000.00 nga standby funds aron suportahan ang nagpadayon nga relief efforts.
Gawas pa niana, gipasabot ni Lucero nga ang DSWD 7 andam nga mopakatap og dugang mga personahe aron motabang sa Provincial Local Government Unit (PLGU) sa Negros Oriental kung mograbe ang sitwasyon.
“Our Quick Response Team (QRT) is on standby to provide technical assistance to the PLGU of Negros Oriental if alert level 4 is declared. With thorough training and preparedness, we are confident that, by working together, we can save more lives and effectively manage the situation,” matud pa ni Lucero. (BANAT NEWS)
- Latest
