Mga opisyales miduyog sa kasubo sa kamatayon ni Kapitan Bucao
CEBU, Philippines — Association of Barangay Captains sa Dakbayan sa Talisay ang nipasar og resolution sa pagpadangat sa ilang pahasubo ngadto sa pamilyang Bucao, human si Kanhi ABC President ug City Councilor ingon man kasamtangan nga Barangay Kapitan sa San Isidro nga si Marietta "Yehyen" Bucao, 63 anyos namatay niadtong adlaw May 18, 2025.
Si Bucao nasulod sa tambalanan sulod sa pipila ka adlaw tungod sa gihambin nga sakit.
Si ABC President Josefina Concial, nibutyag nga lakip sa ilang giduso nga resolution mao ang pag-ila sa dakong natampo ug exceptional works, lakip ang legasiya niini isip usa ka dedikado nga public servant.
Gipadayag ni Concial, uban sa mga sakop sa ABC mohimo usab sila og pagbisita sa panimalay ni Bucao aron mopaabot personal sa ilang pahasubo ngadto sa pamilya nga nagbangutan human giila nila ang nitaliwan nga opisyal nga aktibo sa public service.
Si Talisay City Mayor Samsam Gullas sa iyang mensahe sa iyang social media page kini nipadayag nga naguol siya pag-ayo sa pagkamatay ni Kapitan Yehyen Bucao.
Dugang pa ni Gullas, ang pagkawala niini dili lamang gibati sa iyang pamilya ug mga minahal sa kinabuhi kundili sa tanang mga San Isidrohanon ug Talisaynon nga iyang gialagaran uban ang gugma ug dedikasyon. (BANAT NEWS)
- Latest