P1.2B nga supplemental budget wala matuki sa hunta probinsiyal

CEBU, Philippines — Wala matuki sa hunta probinsyal ang giduso nga P1.2 billion nga supplemental budget nga hisgotan unta sa special session sa Sangguniang Panlalawigan.

Kini human nga wala ma-quorum ang mga miyembro sa provincial board tungod kay lima ra gikan sa 17 unta ka miyembro sa SP ang nitambong sa special session

Ang mga nitambong gilangkuban nila ni Vice Governor ug Presiding Officer Hilario Davide III, board members Glenn Soco, Victoria Corominas-Toribio, Mike Villamor, Red Duterte, ug Kerrie Shimura.

Ang ubang mga miyembro anaa sa abroad samtang ang uban nag-file og official leave.

Si Bokal John Ismael Borgonia kinsa wala usab motambong sa session nagkanayon nga dili siya gusto nga mahimong kabahin sa tataw nga "bad faith" sa pag-aproba sa supplemental budget.

"I refuse to be part of a clear evident bad faith in the approval of this supplemental budget”, matud ni Borgonia.

Si outgoing-governor Gwendolyn Garcia niawhag sa provincial board nga mopahigayon og special session aron tukion ang appropriation ordinance pag-aproba sa 2025 Supplemental Budget 1 sa General Fund nga nikabat ngadto sa P1, 226, 620,213.08, nga gi-certify nga urgent sa gobernador. Apan ang maong supplemental budget wala mapasar tungod kay wala ma-quorum ang mga miyembro sa SP gumikan kay lima ra ang mitambong diin dili mo menos 10 ka miyembro ang kinahanglan nga present o nitambong.

Sayo pa, ang kampo ni governor-elect Pamela Baricuatro nikwestiyon sa kalit nga pagpatawag sa maong special session aron ipasar ang P1.2 billion nga budget. (BANAT NEWS)