Kapin onse mil ka kilo sa basura nahipos sa EMB

CEBU, Philippines — Nakakolekta ang Environmental Management Bureau (EMB) sa Rehiyon 7 og kinatibuk-ang 11,154 ka kilo sa basura gikan sa campaign materials subay sa ilang halapad nga post-election clean-up ug inventory operation sa mga campaign materials nga nagkatag sa mga pampublikong lugar.

Sumala sa EMB-7 kini nga inisyatiba, kabahin sa environmental campaign nga gilusad uban sa mga Local Government Units (LGUs) sa rehiyon nga nagtumong sa recovery ug sustainable nga paglabay sa mga campaign materials.

Gitarget niini ang kasagarang gigamit nga campaign paraphernalia nga naglakip sa tarpaulin posters, plywood boards, nylon ropes, wooden stakes, glossy paper, metal wires, ug mga lansang. Ang ahensya niingon nga kini nga mga materyales, nga sagad gibiyaan pagkahuman sa mga rally sa kampanya ug motorcade, nakuha gikan sa mga kadalanan, parke, imprastraktura sa gobiyerno, ug uban pang mga publiko nga lugar.

Human makolekta, kini gidala ngadto sa Material Recovery Facilities (MRFs) mga LGU alang sa sorting ug segregation.

Ang ma-recycle pa sama sa mga tarpaulin, kahoy, ug metal gitugyan ngadto sa Livelihood Upcycling Offices ug akreditadong junkshops aron himoong eco-friendly nga mga produkto sama sa eco-bags, roofing covers, ug uban pang praktikal nga gamit sa panimalay ug komunidad.

Samtang ang ubang mga materyales gitanyag usab sa buy-back nga mga programa nga nagsuporta sa mga lokal nga recyclers ug mga negosyante.

Ang non-recyclable ug residual waste, hustong ilabay pinaagi sa sanitary landfill, Refuse Derived Fuel (RDF) nga mga pasilidad, ug gitudlo nga Residual Containment Areas, subay sa probisyon sa Republic Act No. 9003 o ang Ecological Solid Waste Management Act of 2000 ug uban pang may kalabutan nga environmental regulations. (BANAT NEWS)