Garcia: Adunay kapin sa P6 bilyones ang panudlanan sa probinsiya
CEBU, Philippines — Sa dili pa mobiya sa iyang katungdanan gipahibalo ni Gobernador Gwendolyn Garcia nga adunay kapin sa P6 bilyones nga available nga cash on hand ang Probinsiya sa Sugbo.
Gipadayag sa Kapitolyo nga nagpabilin usab nga walay utang ang probinsiya sa ngadto sa bisan-asa nga financial institution.
Ang Provincial Treasurer’s Office nitaho nga gawas sa mga income-generating ventures, revenue collection ug gahin gikan sa nasudnong panudlanan aduna pay laing tinubdan sa kita ang Probinsiya sa Sugbo.
"One source of income for the Capitol is the interest earned from bank deposits, known as the “overnight placement", matud sa Kapitolyo pinaagi sa Sugbo News.
Gikataho nga sukad sa Hulyo 2024, ang probinsiya nakaangkon na og P195.7 million nga interest.
Ang assets usab sa probinsiya niabot ngadto sa P310 bilyones hinungdan nga mao kini ang gikonsidera nga pinakaadunahan nga probinsya lukop nasud.
Sa pag-andam ni Garcia ug Vice Governor Hilario Davide III sa pag-turnover sa responsibilidad sa sunod nga elected officials, ang gobernador nipahimangno sa board members nga ang Sugbo nagpabilin gihapon nga numero uno gikan sa 82 ka probinsiya lukop nasud.
Nanghinaot usab si Garcia sa mga bag-ong bokal nga mapadayon ang iyang mga programa ug proyekto nga unang gipatuman ubos sa iyang administrasyon sama sa Sugbo Kahanas, Sugbo Negosyo, ECD, Caravan of Services, Sugbusog ug uban pa.
Samtang si Davide nanghinaot nga magpabilin nga hiniusa ang bag-ong set sa mga miyembro sa Sangguniang Panlalawigan.
“We decided nga wala gyu’y majority and minority floor leader, floor leader ra gyud, I hope ma-retain na ninyo”, matud ni Davide.
Si Garcia ug Davide parehong motapos sa ilang termino karong Hunyo 30, 2025.
Si Garcia nipasubli og papili pagka-gobernador sa nilabay’ng election apan napildi kini ni governor-elect Pamela Baricuatro samtang si Davide nilansar pagka-kongresista sa segundo distrito apan napildi usab kini sa incumbent congressman nga si Edsel Galeos. (BANAT NEWS)
- Latest
