Cebu City ug Kapitolyo mag-collaborate alang sa 93-1

CEBU, Philippines — Nisaad ang mga bag-ong lider sa dakbayan ug probinsiya sa Sugbo nga adunay kolabarasyon tali sa duha aron nga masulbad ang dekada na nga isyu sa 93-1 lots.

Si Cebu City mayor elect Nestor Archival nagkanayon nga hagbay ra nga adunay kasabotan ang Dakbayan sa Sugbo ug Probinsiya sa Sugbo kalabot sa 93-1.

Pasabot ni Archival ang 2016 nga land swap deal sa 93-1 lots nga gipirmahan sa kanhi gobernador Hilario Davide III ug kanhi Cebu City mayor Tomas Osmeña.

Atol sa media news forum karong adlawa, si Archival nipadayag nga ang Dakbayan sa Sugbo na gyud ang tag-iya sa luna ubos sa 93-1 nga kasamtangang giukopahan sa mga residente sa Dakbayan sa Sugbo.

“Ang usa sa mga naka-hamper sa pag-push through with the 93-1 ownership sa mga occupants is ang atong provincial government. Because after the agreement was consummated, ang atong mga title sa yuta toa na sa probinsiya, ang title sa 93-1 naa na nato, it’s very clear”, matud ni Archival.

“But somebody from the city government, gikuha ang atong title gihatag ngadto balik sa provincial government”, dugang ni Archival.

Matud ni Archival nga kon adunay panag-uyon tali sa Dakbayan sa Sugb ubos sa iyang liderato ug sa Probinsiya sa Sugbo ubos sa pagdumala ni governor-elect Pamela Baricuatro mapadayon ang unang napirmahan na nga kasabotan.

Sa iyang bahin, si Baricuatro nga nitambong sa susamang forum nagkanyon nga iyang i-honor o dunggon ang unang kasabotan nga nakab-ot sa iyang predecessor tali sa Dakbayan sa Sugbo.

Iyang gisaad kang Archival nga dili mabalaka tungod kay andam siya nga mo collaborate sa Dakbayan sa Sugbo aron masulbad nag isyu sa 93-1.

Sa panahon ni kanhi gobernador ug karon Bise Gobernador Hilario Davide III ug kanhi mayor Osmeña nigama sila og Deed of Donation and Acceptance sa mga luna nga nasakop sa 93-1 diin ubos sa maong kasabotan ang mga luna nga sakop sa 93-1 nga niabot sa 32 ka ektarya nga nahimutang sa nagkadaiyang barangay sa siyudad ihatag gikan sa Kapitolyo ngadto sa Dakbayan sa Sugbo.

Bugti niini, ang luna nga gipanag-iya sa Dakbayan sa Sugbo nga gilangkuban sa 2.5 ka ektaraya nga luna sa South Road Properties (SRP), 3.3 ka ektarya nga luna sa luyo sa SM City Cebu sa Barangay Mabolo; 2.5 ka ektarya nga botanical garden sa luyo sa SM Seaside City sa SRP; siyam ka ektarya nga luna sa Barangay Pulpogan, Lungsod sa Consolacion; 1.37 ka ektarya nga luna sa septage treatment plant ug 2,476 metro kwadrado nga luna sa city abattoir.

Apan gikataho nga pag-abot sa administrasyon ni Gobernador GwendolynGarcia wala na gipadayon sa Kapitolyo ang maong kasabotan.

Gipaubos ni Garcia sa PAG-IBIG ang pagbaligya sa maong luna diin ang mga ukopante moaplay og housing loan sa PAG-IBIG aron nga hingpit na nga mapanag-iya ang luna nga giokupaha sa residente nga anaa nasakop sa 93-1.  BDB BANAT NEWS