Transition team giumol na ni Governor Garcia

CEBU, Philippines — Transition team giumol na ni outgoing Governor Gwendolyn Garcia alang sa pag-ilis na og bagong pamunuan sa Probinsya sa Sugbo.

Usa ka executive order ang giluwatan ni Garcia pagmugna og local governance transition team subay sa memorandum circular sa Department of Interior and Local Government (DILG).

Kini alang sa insaktong pag turn over sa mga mosunod na records, dokumento, ug assets lakip na sa pag-assess sa mga nalampos na nga mga programa o proyekto, nagpadayon pa nga programa, ug umaabot nga mga inisyatiba sa Probinsya sa Sugbo.

Ang transition team maoy mosiguro sa han-ay nga proseso sa transition alang sa mga local government units aron masiguro nga hapsay ug han-ay ang pagpasa sa responsibilidad ug mapadayon ang serbisyo human sa eleksyon gikan sa outgoing padulong sa incoming nga opisyal.

Sa EO ni Garcia, siya maoy magsilbing chairperson sa transition team samtang vice chairperson si outgoing Vice Governor Hilario Davide III.

Ang mga miyembro sa team mao ang mga department heads sa Kapitolyo sama ni Dr. Jesus Robel Sastrillo ang DILG Provincial Director; Atty. Pulchra Mae Acevedo ang secretary sa Sangguniang Panlalawigan; Mark Anthony Ynoc, ang Presidente sa Mandaue Chamber of Commerce and Industry.

Ang secretariat mao si Nerces Bispo ang pangulo sa Provincial Planning and Development Office (PPDO) ug ENP June Ilyn Terado ang assistant department head sa PPDO. MEL BANAT NEWS