Mga maayong proyekto ug programa nga nasugdan ipadayon ni Archival

CEBU, Philippines — Si Cebu City mayor-elect Nestor Archival nipdayag nga mosuporta ug mopadayon sa nasugdang proyekto ni outgoing-mayor Raymond Alvin Garcia.

“I will support. I will continue to do what is right especially kong naay budget”, tubag ni Archival sa hangyo ni Garcia nga padayonon ang mga nasugdan nga mga proyekto ubos sa hamubo nga administrasyon niini.

Matud ni Archival sa pagpakighinabi niini sa Openline News Forum kagahapon diha sa Casino Español nga daghang nasugdan nga proyekyo ang kagamhanan sa siyudad apan walay kasiguradohan kong aduna ba'y pundo aron nga mapadayon kini sama sa nahitabo sa Cebu City Medical Center nga wala pa nahuman gumikan kay dili bulto ang pagpagawas sa pundo alang niini.

Hinungdan nga buot una sutaon ni Archival kon aduna ba’y nakagahin nga pundo ang matag proyekto nga nasugdan aron nga mahatagan og completion date ugaling kong adunay pundo.

Hinuon gipasalig ni Archival nga ipadayon niya ang mga maayong proyekto ug programa alang sa mga Sugbuanon tungod kay pareho sila og tumong ni Garcia nga mao ang pagpangalagad alang sa kaayohan sa kinabag-an.

Gikataho nga ipadayon usab sa administrasyon ni Archival ang pagpabalik sa pagpahigayon sa Sinulog Festival diha sa Cebu City Sports Center diin nasugdan na kini ni Garcia karong tuiga.

Matud usab ni Archival nga kinahanglan ipabilin kini sa dapit diin nagsugod ang konsepto sa dakong kapistahan sa Sugbo.

Dugang ni Archival nga dili na angayang ibalik ang venue sa South Road Properties diin adunay daghang mga gikonsidera sama sa layo kini sa sentro, menos ang mga kahoy nga kapasilongan sa mga mosaksi sa kasaulogan, menos ang halin sa mga negosyante nga anaa sa sentro ug uban pa.

Gikataho nga gipahigayon ang Sinulog diha sa SRP ubos sa adminisitrasyon ni kanhi mayor Michael Rama sulod sa duha ka tuig human sa pagsulbong sa pandemiya.   BDB BANAT NEWS