Nanguha og chocolates sa usa ka tindahan gidakop
CEBU, Philippines — Balhog sa prisuhan sa Carbon Police Station 5 sa Cebu City Police Office(CCPO) ang usa ka 20 anyos nga lalake human nanguha og chocolates unya wala mobayad sa cashier sa grocery store sa may Natalio Bacalso Avenue, Barangay Pahina Central, siyudad sa Sugbo niadtong Lunes sa gabii, Mayo 19, 2025.
Ang nadakpan mao si alyas JL, 20 anyos, dunay kaipon, taga Riverside, Banawa, Barangay Guadalupe, Siyudad sa Sugbo.
Gitugyan ang suspetsado sa mga empleyado sa grocery store sa mall human gihimo ang krimen.
Ang gwardiya sa mall ang nidakop sa suspect human nasakpan nga nanguha kini og 40 kabuok dark ug milk Toblerone chocolates nga ang tanan nagkantidad og P5, 680 unya wala bayri.
Gisulod sa suspect ang mga chocolates sa itom nga backpack niini. Gisuwayan og kuha ang habig sa suspect apan nagdumili kini pagluwat og pamahayag.
Matud pa sa kapolisan nga ibaligya sa suspect ang mga chocolates aron dunay magamit sa bisyo niini.
Kasong pagpangawat ang ipasaka sa kapolisan batok sa suspetsado. MEL BANAT NEWS
- Latest
