52 party-list giproklamar na

CEBU, Philippines — Opisyal na nga giproklamar sa Commission on Elections (Comelec) ang 52 ka napili nga party-list groups sa 2025 midterm elections, samtang gi-postpone ang proklamasyon sa laing duha — Duterte Youth ug Bagong Henerasyon (BH) — tungod sa pending nga disqualification cases.

Ang maong 52 ka party-list mookupar sa 59 sa 63 ka puwesto alang sa mga party-list representatives sa Kamara.

Ang katapusang upat ka mga puwesto magdepende sa resulta sa desisyon sa Comelec sa mga pending nga kaso nga naglambigit sa Duterte Youth ug BH.

Matud sa Comelec, ang nag-unang tulo ka party-list makaangkon og tulo ka puwesto matag usa; ang sunod nga tulo makakuha og duha, samtang ang ika-7 hangtod ika-54 makadawat og usa ka puwesto matag usa sa ika-20 nga Kongreso.

Lakip sa kumpirmado nga makakuha og tulo ka puwesto mao ang: 1. Akbayan nga nakakuha og 2,779,621 ka boto o 6.63 porsiyento ug; 3. Tingog nga adunay 1,822,708 boto o 4.34 porsyento.

Sumala sa Philippine Star, ang kadaugan Akbayan nakabuhi og dugo sa maong sektor kay hapit sila nawad-an og puwesto niadtong 2022 ug mibalik sa Kongreso human madiskwalipika ang An Waray niadtong 2024.

Kini nagtimaan sa lig-on nilang comeback sukad sa katapusang pagkapili og tulo ka puwesto niadtong 2004.

Sa laing bahin, ang tulo ka party-list nga nakaangkon og duha ka pwesto mao ang: 4. 4Ps nga adunay 1,469,571 ka boto o 3.50 porsyento; 5. ACT-CIS – 1,239,930 ka boto o 2.96 porsyento ug; 6. Ako Bicol nga may 1,073,119 ka boto o 2.56 porsyento.

Samtang, gikompirmar sa Comelec nga 47 sa 48 ka party-lists nga nakadaog og usa ka puwesto ang giproklamar tungod kay gi-postpone ang proklamasyon sa Bagong Henerasyon nga anaa sa top 39 tungod sa kaparehong rason sa Duterte Youth.

Base sa katapusang ihap, 17 ka incumbent groups ang nataktak, lakip ang Gabriela Women’s Party nga naglingkod sukad pa niadtong 2004, gawas nalang kon hingpit na nga ma-disqualify ang Duterte Youth ug Bagong Henerasyon.

Ang 47 ka party-lists nga nakakuha og usa ka puwesto matag usa mao ang: 7. Uswag Ilonggo, 8. Solid North Party, 9. Trabaho, 10. CIBAC, 11. Malasakit@Bayanihan, 12. Senior Citizens, 13. PPP, 14. ML, 15. FPJ Panday Bayanihan, 16. United Senior Citizens, 17. 4K, 18. LPGMA, 19. Coop-NATCCO, 20. Ako Bisaya, 21. CWS, 22. Pinoy Workers, 23. AGAP, 24. Asenso Pinoy, 25. Agimat, 26. TGP, 27. SAGIP, 28. Alona, 29. 1-Rider Party-list, 30. Kamanggagawa, 31. GP (Galing sa Puso), 32. Kamalayan, 33. Bicol Saro, 34. Kusug Tausug, 35. ACT Teachers, 36. One Coop, 37. KM Ngayon Na, 38. Abamin, 40. TUCP, 41. Kabataan, 42. APEC, 43. Magbubukid, 44. 1Tahanan, 45. Ako Ilocano Ako, 46. Manila Teachers, 47. Nanay, 48. Kapuso PM, 49. SSS-GSIS Pensyonado, 50. Dumper PTDA, 51. Abang Lingkod, 52. Pusong Pinoy, 53. Swerte, and 54. Philreca.

Kun ma-disqualify ang Duterte Youth ug Bagong Henerasyon, ang mga party-list nga naa sa ika-55 hangtod ika-58 — Gabriela Women’s Party, Abono, Ang Probinsyano, ug Murang Kuryente — mahimong makadaug og usa ka puwesto matag usa. (BANAT NEWS)