Job fair para sa mga kawa ni sa city hall ipahigayon

CEBU, Philippines — Sa dili pa mahuman ang termino ni Mayor Raymond Alvin Garcia karong Hunyo 30, 2025, magpahigayon og job fair alang sa tanang casual ug job order nga mga empleyado sa Kagamhanan sa Dakbayan sa Sugbo.

Mao kini ang hangyo ni Garcia atol sa tigum sa mga department head diin giingnan niya ang Department of Manpower and Development and Placement nga magpahigayon sa maong job fair alang sa mga empleyadong mawagtangan og trabaho sugod karong Hulyo.

“I told them to have this done thoroughly and properly, and tanan ma-inform nga mga empleyado kay para they have something to lean on and bank on in case dili sila ma-renew”, suma pa ni Garcia.

Nimando na si Garcia nga tan-awon ang kalidad, educational attainment, ug ang kasinatian sa trabaho sa matag empleyado aron mahaom kini sa kwalipikasyon sa kun unsa nga kompanya nga angayan nila nga kasudlan.

Padayag pa ni Garcia nga mas maguol siya sa mga tawo nga mawagtangan og trabaho human sa iyang termino mao nga bisan pa man og mokanaog na siya gusto gihapon niya nga dili mawad-an og panginabuhian ang mga empleyado nga nagtinarong og panerbisyo sa gobyerno bisan og dili regular ang posisyon niini.

“Daghan baya ta og maayo nga mga empleyado, so, I hope that most of them will retain kay after all, nanarbaho ra man gyud ni sila, wala man ni sila mag-apil apil sa pagpangampanya”, suma pa ni Garcia.

Gibana-bana nga anaa sa 5,000 ka mga casual ug job order nga mga empleyado ang anaa nanarbaho sa kagamhanan sa Dakbayan sa Sugbo. (BANAT NEWS)