Ordinansa pagmugna og recovery program sa kabataan giduso

CEBU, Philippines — Usa ka community-based recovery program para sa kabataan nga naapektuhan sa paggamit og drugas nga kasamtangang gi-implementar sa Mandaue City, hapit na ma-institutionalize.

Kini human gi-aprobahan sa Mandaue City Council sa unang pagbasa ang usa ka ordinansa nga nagtukod sa maong programa.

Ang Mandaue City Substance Abuse and Mental Health Office (SAMSHO), kauban ang Bidlisiw Foundation Inc.—usa ka non-government organization—maoy nag-una sa community rehabilitation services para sa kabataan nga naggamit og druga (Children Who Use Drugs o CWUDs) sukad pa sa 2022.

Base sa national data niadtong 2023, 41.96 porsyento sa mga nagreport sa ilang unang paggamit sa druga naa sa edad nga 15 hangtud 19 anyos.

Sa Mandaue City, 109 sa 1,106 ka aktibong kleyente ang mitug-an nga nakagamit sila og druga sa wala pa sila mag-edad og 18. Kadaghanan kanila mga out-of-school youth, samtang ang uban nakasala sa balaod ug naapil sa paggamit sa drugas.

Matud ni SAMSHO Head, Atty. Ebenezer Daryl “Ben” Manzano, nga ang programa kasamtangan nang gi-implementar isip usa sa mga inisyatibo sa Mandaue City aron makahimo og usa ka community-based rehabilitation program para gyud sa kabataan nga nalambigit og drugas.

Gipadayag ni Manzano nga ang pag-institutionalize sa programa maghatag og lig-on nga mga protokol aron maprotektahan ang CWUDs.

“Dapat lahi gyud ang pagtratar nato sa mga bata. Dili parehas sa pagtratar nato sa mga hamtong,” matud ni Manzano.

Gitug-an usab ni Manzano nga ang kasagaran gigamit sa mga kabataan sa siyudad mao ang shabu, marijuana, ug mga inhalants sama sa rugby.

Gawas sa rehabilitasyon nga maoy nag-unang interbensyon, ang programa naghatag usab og aftercare services nga nakapokus sa reintegration. Apil niini ang capacity-building, skills training, ug pagtabang sa pagpangita og trabaho alang sa mga nakatapos sa programa.

Ang ordinansa nga gisugyot ni Konsehal Oscar Del Castillo, nga maoy chairman sa Committee on Police, Fire, and Penology, nagtumong sa pagtukod sa “Mandaue City Community-Based Recovery Program for Children Whose Lives Include Drugs.” Kini naghatag og komprehensibong framework nga nagtutok sa isyu isip public health ug mental well-being concern, dili krimen.

Ang mga accredited nga NGOs nga kabahin sa programa makadawat og pinansyal nga tabang ug training support. (BANAT NEWS)