Pag-hire og dugang mga magtutudlo giaprobahan sa DBM

CEBU, Philippines — Dugang mga magtutudlo ang gilauman nga ma-hire para sa School Year 2025-2026 human maaprobahan sa Department of Budget and Management (DBM) ang pagmugna og 16,000 ka mga bag-ong teaching positions sa mga pampublikong tunghaan sa tibuok nasod.

Matud sa DBM, kini subay sa direktiba ni Presidente Ferdinand "Bongbong" R. Marcos Jr. nga palig-onon ang sektor sa edukasyon ug masiguro ang igong manpower sa mga pampublikong tunghaan.

Ang 16,000 ka bag-ong teaching positions kabahin sa unang tranche sa 20,000 ka mga posisyon nga gitarget nga mamugna karong tuiga.

Ang gi-aprobahan nga mga posisyon naglakip sa mosunod: 15,343 Teacher I posts nga dunay Salary Grade 11; Special Science Teachers nga 157 kabook nga dunay Salary Grade 13 ug; 500 ka mga Special Education (SPED) Teachers nga dunay Salary Grade 14.  Aron mas flexible, himoon ang mga teaching positions sa Senior High School sa division level, nga maghatag og katungod sa mga School Division Superintendent sa pagbalhin o pag-assign kanila kun asa sila labing kinahanglan.

"Suportado po ng DBM ang pagbibigay-prayoridad ng gobyerno sa kapakanan ng ating mga guro. Gusto po nating siguraduhin na bawat bata ay may teacher na tututok at handang tumulong sa kanilang pag-aaral. Seryoso po tayo sa hangaring mapaganda ang kalidad ng edukasyon sa bansa," dugang ni Pangandaman.

Gibutyag usab sa ahensya nga ang P4.194 bilyones nga gikinahanglan sa pagpundo sa bag-ong mga item maggikan sa built-in appropriations sa DepEd ubos sa 2025 General Appropriations Act, nga gitagana alang sa pagkuha og bag-ong school personnel.

Hugot na nga nakig-alayon sa DepEd ang mga rehiyonal nga buhatan sa DBM alang sa pag-release sa mga Notices of Organization, Staffing, and Compensation Action (NOSCA) ug pundo, nga alang lamang sa mga teaching positions nga okupado na. (BANAT NEWS)