Garcia mohangyo ni Archival nga padayonon ang iyang mga proyekto   

CEBU, Philippines — Si Cebu City outgoing-mayor Raymond Alvin Garcia nipaniguro sa mga trabahante sa Cebu City Hall alang sa smooth transition sa umaabot nga administrasyon.

Kini ang gipadayag ni Garcia atol sa flag raising nga gipahigayon  kagahapon sa buntag diha sa Plaza Sugbo.

Si Garcia nakighinabi sa mga trabahante sa city hall sa unang higayon human siya napildi sa nilabay’ng eleksiyon ug giila ang kadaogan ni mayor-elect Nestor Archival.

Si Garcia namahayag ngadto sa mga kawani sa city hall nga dili angay mabalaka sa iyang kapildihan ug dili na kini bag-o alang kaniya.

Matud ni Garcia nga ang kapildihan sa eleksiyon usa usab kini ka oportunidad nga molambo tungod kay adunay mga bag-ong pagtulun-an nga makat-onan. Si Garcia niawhag sa mga trabahante sa city hall nga ipakita ang ilang hugot nga suporta sa nagsingabot nga administrasyon aron sa pagsiguro sa pagpasayon sa public service.

Nunot niini, naglaom si Garcia nga unta mapadayon sa sunod administrasyon ang mga nasugdan niya nga mga proyekto ubos sa iyang administrasyon.

Una sa listahan mao ang paghuman sa Cebu City Medical Center diin na-bid-out ug na-award ug ang kuwang nalang niini ang pinirmahay tali sa kagamhanan ug sa kontraktor.

Lakip na sa gilaoman ni Garcia nga unta dili ikanselar ang kontrata alang sa construction sa lima ka school buildings ug ang pagtiwas sa family health center sa Barangay Labangon nga mabutangan og mga ekipo ug mga personnel nga maoy moatiman sa maong pasilidad ug ang padayon nga pagmentinar sa family health center sa Barangay Apas diin makaakumodar kini og 200 ka mga pasyente matag adlaw.

Naglaom usab si Garcia nga unta mamentinar ang slope protection nga gipabutang niya sa mga bukirang barangay sa siyudad ilabi na ang anaa sa Barangay Sirao.

Ug ang iyang gisugdan nga transitional housing, plano sa flood control ug ang drainage master plan, ang mga yuta nga napalit sa Barangay Mambaling aron magamit sa Cebu Bus Rapid Transit, paghatag og libre nga maintenance medicine sa mga senior citizen ug sa mga nanginahanglan ug ilabi na ang pagpaagas og tubig sa siyam ka barangay sa kabukiran nga pila na ka tuig wala makasinati og limpiyo nga tubig. Gikatahoi nga ihangyo kini ni Garcia ngadto kang Archival. (BANAT NEWS)