DEPW nisugyot nga maghimo og agianan sa tubig sa sapa

CEBU, Philippines — Nisugyot ang Department of Engineering and Public Works nga maghimo og agianan sa tubig sapa kilid sa gitukoran og paril sa luna sa Aznar Basque Properties Inc. sa Sitio Cahipa sa Barangay Hipodromo, Dakbayan sa Sugbo.

Ang acting assistant sa operations sa DEPW Ruel Tahum nagkanayon nga mao kini ang ilang gipadala nga sugyot ug plano sa ABP Inc. sa pagbutang sa maong agianan sa tubig sa sapa.Gihuwat nila ang tubag gikan niini kong uyon ba sila sa maong sugyot. “Kung mouyon sila sa among plano, mamidpid nalang mi kay gamay na man lang kaayo ang ilang giablihan nga agianan sa tubig sa sapa”, matud ni Tahum.

Ang sapa nahimutang kini sa tunga-tunga sa luna sa Aznar nga adunay tulo ka metros ang gilapdon ug tulo usab ka metros ang gilawmon.

Nasayran sa DEPW nga human nga gibutangan og paril sa ABP Inc. ang ilang luna, gibutangan lang kini nila og 12 ka pulgada nga tubo aron maoy lutsanan sa tubig sa sapa.

Matud ni Tahum nga usa ka tuig na kini nga yangongo sa mga residente tungod kay matag bunok sa uwan mosaka ang lebel sa tubig.

Apan tungod kay kasamtangang gituki pa sa konseho ang kaso sa ABP Inc., nagpahigayon og flood suction ug band-aid solution ang DEPW aron nga makatabang sa pagkunhod sa tubig baha. —/BDB (BANAT NEWS)