Mga polis sa San Fernando, Mambaling gipasalamatan
CEBU, Philippines — Dako ang pasalamat sa usa ka netizen sa mga polis nga nadestino sa Mambaling Police Station 11 sa Cebu City Police Office (CCPO) ug San Fernando Police Station sa Cebu Police Provincial Office gumikan kay na-recover ang iyahang cellphone ug ATM nga gilabni sa esnatser diha sa Natalio Bacalso Avenue, siyudad sa Sugbo niadtong Sabado sa gabii sa miaging semana.
Sa post ni Abrielle Carliegh Ywedelle iyahang gisaysay nga niadtong Sabado padulong siya mouli sa Sibonga dihang gilabni ang iyahang cellphone ug ATM atbang sa Cebu City Medical Center samtang nagsakay og bus.
Dunay nakasakay nga polis ang biktima nga si Police Chief Master Sergeant Herbert Pananganan sa San Fernando Police Station.
Si PCMS Pananganan maoy nanawag ni Police Master Sergeant Ranulfo Villaver Jr., sa Mambaling Police Station 11.
Sa wala'y pagduha-duha mitabang si PMSG Villaver sa biktima aron ma-recover ang cellphone ug ATM niini.
"Salute po sa inyong duha sir. Cebu City is still safe tungod ninyo sir. Thank you so much po," tipik sa post sa netizen.
Gihulagway sa Police Regional Office (PRO)-7 ang paspas nga aksyon sa kapolisan nagpakita lang sa walay paglubad nilang pagtuman sa ilang gipanumpaan para sa kaluwasan sa publiko.
"This incident reflects the level of dedication and readiness our police force brings to the community. We want Cebuanos and everyone who visits or does business here to know that they are safe. Our men and women in uniform are always ready to respond and serve," sigon ni Maranan.
Sa padayon nga kooperasyon sa publiko ug ang wala'y kakapoy nga dedikasyon sa local police, ang Sugbo magpabilin nga most livable ug investment-ready nga lugar sa Pilipinas. — /IBM (BANAT NEWS)
- Latest
