CV dunay 225 ka bag-ong kaso sa HIV

CEBU, Philippines —  Misaka sa ika-unom nga pwesto ang Central Visayas sa tibuok nasud nga dunay kinadaghanan og bag-ong natala nga kaso sa Human Immunodeficiency Virus (HIV) sa unang kwarter ning tuig 2025.

Base sa pinakabag-ong HIV/AIDS Surveillance Report nga gipagawas sa Department of Health (DOH), niabot og 225 ang bag-ong kaso nga natala sa Region 7 gikan Enero hangtud Marso 2025 — o 4- porsyento sa 5,101 ka kaso nga natala tibuok nasud sa maong panahon.

Apil ang Central Visayas sa unom ka rehiyon nga adunay pinakataas nga kaso sa HIV sa tibuok nasud, kauban ang National Capital Region (NCR), CALABARZON, Central Luzon, Davao Region ug Western Visayas, nga collectively mitampo og 69 porsyento sa tanang bag-ong kaso sa nasud.

Sukad tuig 1984 hangtod Marso 2025, nakatala na ang Central Visayas og 10,984 ka kaso sa HIV, nga 7 porsiyento sa kinatibuk-ang 148,831 ka kumpirmadong kaso sa nasud.

Gikan Enero 2020 hangtod Marso 2025,  dunay 4,801 sa mga kaso sa rehiyon ang na-record.

Sa nasudnong datos, ang kadaghanan sa mga bag-ong natakboyan og HIV pulos mga batan-ong lalaki.

Ang 95 porsyento sa bag-ong kaso o 4,849 sa Q1 2025 kay mga lalaki, ug halos katunga niini anaa sa 25-34 anyos ang pangidaron, gisundan sa mga 15-24 anyos.

Sa laing bahin, 68 porsiyento sa mga bagong kaso mga  babaye ug lalaki , samtang 3 porsyento ang mga transgender women.

Ang pakighilawas ang nagunang paagi sa pagtakod sa HIV, nga mitampo sa 96 porsyento sa mga kaso.

Naalarma sab sila kay 99 porsiyento sa natalang bag-ong natakdan og HIV gamit ang gipasa -pasa nga dagom (drug use) nga 2,627 ka tawo — pulos gikan dinhi sa Central Visayas.

Sa aspeto sa pagtambal sa mga natakboyan niini dinhi nga 6,596 ka tawo nga buhi kasamtangang naka-antiretroviral therapy (ART). Apan 2,772 nila ang wala na mo follow-up o wa na mobalik sa tambalanan.

Sa tibuok nasud, 92,712 ang buhi nga naka-ART, apan 41,786 (45%) lang kanila ang nakapailawom og viral load testing sulod sa milabay nga tuig.

Ang Central Visayas mas ubos pa sa national average sa viral load testing coverage — 33 porsyento lang — apan sa ilang gi test, 86 porsyento ang virally suppressed, kapareho sa national average.

Bisan pa man niini, layo pa gihapon ang nasud sa pagkab-ot sa global targets sa UNAIDS nga gitawag nga 95-95-95.

Ang 95-95-95 nga target nagpasabot nga sa 2030, 95% sa mga tawo nga adunay HIV kinahanglang nasayod sila sa ilang kahimtang, 95% sa mga diagnosed ang magpatambal, ug 95% sa mga gitambalan magpabiling virally suppressed aron malikayan ang pagtakod ngadto sa uban. (BANAT NEWS)