Mga polis ug sundalong nibantay sa midterm elections nakabalik na
CEBU, Philippines — Mga security personnel nga gi-deploy sa tibuok Central Visayas alang sa 2025 Midterm Elections nakabalik na sa Police Regional Office-7 subay na sa malampuson ug malinawon nga pagpahigayon sa National ug Local elections sa rehiyon.
Moabot sa 8,268 ka PNP personnel ang gi-mobilize sa PRO-7 nga gisuportahan sa 937 augmentation forces gikan sa Armed Forces of the Philippines (AFP), Philippine Coast Guard (PCG), Maritime Group, ug ubang national support units.
Ang maong personnel na-assign aron bantayan ang 2,281 voting centers sa Rehiyon Siete apil ang Probinsiya sa Sugbo, Bohol ug Tri-cities sama sa Cebu City, Lapu-Lapu City ug Mandaue City.
Gi-welcome sab s PRO-7 pagbalik sa 51 ka mga polis nga na-deploy sa Bangsamoro Autonomous Region in Muslim Mindanao (BARMM) nga nagsilbing Special Board of Election Members (SBEMs) sa bag-o lang nahuman nga piniliay.
Ang maong regional deployment nahimong kabahin sa komprehensibong election security plan nga ang tinguha mao ang pagsiguro sa luwas, matinud-anon ug hapsay nga eleksiyon sa Central Visayas.
Ang presensiya sa uniformed personnel sa polling areas nakatabang sa pagpakgang sa pagmentinar sa kalinaw sa voting period.
Si PRO-7 Regional Director Police Brigadier General Redrico Maranan nagpasalamat sa deployed personnel sa ilang disiplina ug propesyonalismo sa iyang mga sakop.
Atol sa election period, walay dagkong panghitabo nga natala sa tibuok rehiyon. (BANAT NEWS)
- Latest
