Mga benepisyaryo sa 4Ps gibansay alang sa construction skills

CEBU, Philippines —  Malampusong nakompleto sa mga benepisyaryo sa Pantawid Pamilyang Pilipino Program (4Ps) sa Mandaue City, Cebu ang duha ka adlaw nga pagbansay-bansay sa Standard Drywall ug Ceiling System Installation nga nagtudlo kanila sa in-demand nga construction skills.

Sumala sa Department of Social Welfare and Development (DSWD) Field Office 7, kini nga inisyatiba maoy tubag sa nagkadako nga panginahanglan sa skilled labor sa nag-uswag nga sektor sa imprastraktura sa Sugbo.

Ang pagbansay-bansay gisalmotan sa 41 ka partner-beneficiaries sa 4Ps—26 ka babaye ug 15 ka lalaki—nga nagpasiugda sa nagkadaghang opurtunidad sa mga kababayen-an sa industriya sa konstruksyon nga tradisyonal nga gidominar sa mga lalaki.

Kini nga proyekto, hiniusang paningkamot tali sa DSWD Field Office 7 ug Knauf Philippines, Inc., kabahin sa pasalig sa ahensya nga makig-alayon sa civil society organizations (CSOs) ug pribadong sektor aron mapalambo ang pagpatuman sa 4Ps pinaagi sa nagkalain-laing programa ug serbisyo.

Matud sa ahensya tungod sa paspas nga pag-uswag sa real estate ug imprastraktura sa Sugbo, nitaas ang panginahanglan sa mga kuwalipikadong construction workers.

Nunot niana, kining training nga gihatag sa Knauf Philippines, Inc. makadugang sa gidaghanon sa mga trabahante nga makahibalo sa pag-instalar og drywall ug ceiling systems sa Sugbo ug makapamenos sa gasto sa mga kontraktor tungod kay imbes mo-hire o magdala og mga trabahante gikan sa Luzon, ila hinuong prayoridad ang lokal nga mga trabahante.

Ang Technical Training Officer sa Knauf Philippines nga si Vincent Largo mipaambit nga ang Knauf partition systems nagtanyag og flexible ug moderno nga mga solusyon alang sa pagmugna og internal walls ug partitions para sa lain-laing klase sa building, residential man, commercial, o industrial.

Dugang sa DSWD Field Office 7 kini nga kolaborasyon maghatag usab og long-term employment opportunities sa mga benepisyaryo nga mahimong makapatunhay sa ilang kita aron masuportaran ang ilang mga basic needs sama sa pagkaon, puy-anan, sinina, ug edukasyon.

Ang susamang mga sesyon sa pagbansay ipahigayon sa dili madugay sa Cebu City ug Lapu-Lapu City, nga target usab ang mga sakop sa 4Ps.

Human niini nga mga pagbansay-bansay, ang Knauf Philippines nagplano nga mopahigayon og "K-Trabaho Fair" aron makonektar ang mga bag-ong nabansay nga mga trabahante sa mga contractors.