Magic 12 sa Senado nakumpleto na

CEBU, Philippines — Nahuman na sa pag-canvass ang National Board of Canvassers (NBOC) sa tanang Certificates of Canvass (COCs) alang sa 2025 midterm elections sulod lang sa tulo ka adlaw, gikan Mayo 13 hangtod Mayo 15, 2025.

Matud sa Commission on Elections (Comelec), kini ang pinakapaspas nga canvassing sa kasaysayan sa ahensya, nga giila nila nga usa ka "record-breaking feat."

Natapos sud sa tulo ka adlaw sa NBOC ang pagproseso sa 175 ka COCs, diin 58 nianang mga adlawa.

Sumala sa Comelec, naggikan kini sa 64 ka Overseas Voting Posts; 110 ka Local COCs o gikan sa mga probinsya, siyudad, munisipalidad, ug distrito ug; 1 ka COC alang sa Local Absentee Voting, nga naglangkob sa mga Armed Forces, Philippine National Police, ug media practitioners.

Una nang miingon si Comelec Commissioner George Garcia nga ang final data gikan sa NBOC maoy gamiton sa pagdeterminar sa 12 ka mananaog nga senador ug 63 ka party-list groups.

Kagahapon lang Biyernes, Mayo 16, nahuman sa pag-canvass ang NBOC sa opisyal ug pinal nga resulta sa 2025 senatorial race ug gianunsiyo dayon sa Comelec ang final "Magic 12."

Nag-una sa listahan mao si Bong Go nga adunay 27,121,073 ka boto, gisundan ni Bam Aquino nga adunay 20,971,899, Bato dela Rosa sa ika-tulo nga puwesto nga adunay 20,773,946, Erwin Tulfo sa ika-upat nga adunay 17,118,881, Kiko Pangilinan sa ika-lima nga adunay 15,343,229, ug Rodante Marcoleta sa ika-unom nga adunay 15,250,723.

Anaa sa ika-pito nga puwesto mao si Ping Lacson nga adunay 15,106,111 ka boto gisundan ni Tito Sotto nga adunay 14,832,996, Pia Cayetano sa ika-siyam nga adunay 14,573,430, Camille Villar sa ika-10 nga adunay 13,651,274, Lito Lapid sa ika-11 nga adunay 13,394,102, ug Imee Marcos sa pinakaulahing puwesto nga adunay 13,339,227 ka boto.

Ang 12 ka mga mananaog nga senador gikatakdang iproklamar karong Sabado, Mayo 17.

Samtang, ang nag-unang unom ka party-list groups mao ang Akbayan nga adunay 2,776,316 boto (6.66%), Duterte Youth nga adunay 2,327,549 (5.59%), Tingog nga adunay 1,817,461 (4.36%), 4Ps nga adunay 1,461,427 (3.51%), ACT-CIS nga adunay 1,237,929 (2.97%), ug Ako Bicol nga adunay 1,072,171 (2.57%).

Sa laing bahin, gibutyag sa Comelec nga 82.20 porsiyento ang final voter turnout sa bag-o lang natapos nga eleksyon, nga maoy labing taas nga voter turnout sa kasaysayan sa midterm elections sa nasud.

Sa karon nga piniliay, ang kinatibuk-ang ihap sa mga botante kay 69,673,653 ug niini, 57,350,968 ang nibotar o 82.20 porsiyento.

Matud sa Comelec, ikaduha lang kini sa 84.10 porsyento nga voter turnout sa 2022 presidential elections, diin kapin sa 55 milyones ka mga botante ang aktuwal nga mibotar gikan sa 65 milyones ka rehistradong botante. Niining kalampusan, ang commission nagpadayag sa ilang dakong pasalamat sa tanang sektor—gikan sa mga magtutudlo, pulis, sundalo, treasurer, kawani sa COMELEC, partner nga ahensya ug organisasyon, media, social media platforms, ngadto sa katawhang Pilipino—nga maoy hinungdan sa hapsay ug malampusong pagpahigayon sa 2025 National and Local Elections.  IBM BANAT NEWS