“Mayor of the Night” giplanohang ipatuman ni Archival ug Osmeña

CEBU, Philippines — Gihulagway ni Cebu City mayor-elect Nestor Archival nga magkauyon ug magkahiusa ang estilo sa liderato nila ni vice mayor-elect Tomas Osmeña tungod kay siya ang mopatuman sa mga vision ni Osmeña.

“Tommy’s leadership and me is basically magkakauban gyud kay I understand that Tommy makes the vision more and I will be taking the action”, matud ni Archival.

Matud ni Archival nga aduna sab sila’y sama nga direksiyon sa pagpamuno diin hatagan nila ang matag konsehal og executive functions.

Giklaro ni Archival nga samtang nangampaniya pa silang duha ni Osmeña aduna na  sila’y kolaborasyon sa unsa nga mga ipatuman sa ilang administrasyon sama sa gitawag og “Mayor of the Night” diin si Osmeña mismo ang nagkonsepto niini.

Gipasabot ni Archival nga ang “Mayor of the Night” usa kini ka bag-ong serbisyo sa kagamhanan diin ang serbisyo sa city hall walay tulganay ug gidensinyo kini alang sa mga trabahante nga nagtrabaho sa adlawan nga mamahimong makapahimulos sa mga serbisyo sa city hall human sa ilang trabaho o bisan og gabii na.

Ang duha nagpares sa bag-ohay lang nga natapos nga piniliay ubos sa Bando Osmeña Pundok Kauswagan diin pareho usab sila nga nidaog.

Si Archival ug Osmeña magsugod paglingkod sa ilang katungdanan isip mayor ug bise mayor karong Hulyo 1, 2025.

Nunot niini, gipadayag ni Archival ang kahiusahan sa konseho ubos sa iyang liderato.

 “If we can unite and harmonize the city council, that’s the first thing I should do kay ang tanan nga mga balaod, ang tanan nga mga budget goes into them”, ni Archival pa.

Dugang ni Archival nga nahimo siya’ng sakop sa konseho sa siyudad sulod sa 18 ka tuig ug base sa iyang kasinatian kaila na siya sa mga tawo nga iyang nakauban ug andam  niya nga ila-ilahon ang mga bag-ong tubo sa konseho bisan pa nga usa na siya ka mayor.  BDB BANAT NEWS