Namato og taxi balhog sa prisohan

CEBU, Philippines — Nabalhog sa prisohan ang usa ka 31-anyos nga lalaki human gireklamo sa usa ka 59-anyos nga taxi driver nga namato sa gimaneho nining taxi diha sa Barangay Basak San Nicolas, Dakbayan sa Sugbo kagahapon sa kadlawon.

Ang suspetsado mao si Earl John Mirasol Bauri, taga Cabrero Street, Barangay Basak San Nicolas samtang ang biktima mao si Leonilo Moises Valencia, taga Highway Tagunol, Barangay Basak Pardo, Dakbayan sa Sugbo.

Base sa taho sa Mambaling Police Station sa Cebu City Police Office nga ang suspetsado manglabay og bato sa mga sakyanan nga mangagi diha sa dapit hinungdan nga nakamugna kini og kahuot sa dagan sa trapiko sa lugar.

Ang taxi nga gimaneho sa biktima usa sa niagi sa lugar ug gilabay og bato sa suspetsado hinungdan nga nabuak ang windshield sa taxi ug gisikaran pa ang driver's side maong nalumping.

Gikatahong nikabat ngadto sa P4,500 ang danyos sa taxi ug gipadakop sa biktima ang suspetsado.

Sa pagkasikop sa suspetsado na-recover sa kapolisan ang usa  ka motorsiklo nga Suzuki Smash nga kolor itom ug gituohan nga kinawat kini sa suspetsado.Kasong malicious mischief ug kalapasan sa Akta Republika 10883 kun” An Act Providing for a New Anti-Carnapping Law of the Philippines. ang ipasaka batok sa suspetsado.  BDB BANAT NEWS