Charter anniversary sa Lapu-Lapu gideklarang holiday

CEBU, Philippines — Pormal nga gipahibalo sa Malacañang nga ang Hunyo 17, 2025 usa ka special public holiday sa Dakbayan sa Lapu-Lapu sa pagsaulog sa ika-64 nga charter anniversary sa siyudad.

Giaprobahan kini sa presidente pinaagi sa pagpirma ni Executive Secretary Lucas Bersamin diin niadtong Hunyo 17, 1961 mao usab ang pagpirma ni Presidente Carlos P. Garcia nga ang kanhi Lungsod sa Opon hingpit na nga nahimong Siyudad sa Lapu-Lapu.

Ang maong siyudad ang gilangkuban sa 30 ka barangay diin 11 niini anaa sa Isla sa Olango ug 19 sa mainland.

Niadtong Enero 23, 2007, si kanhi presidente Gloria Macapagal Arroyo ang hingpit usab nga nagproklamar sa Siyudad sa Lapu-Lapu isip highly urbanized city pinaagi sa Proclamation Number 1222 ug nunot niini naumol usab ang Lone Congressional District sa maong siyudad.

Ug gumikan niini ang maong siyudad hingpit  nga nabulag ubos sa kagamhanan sa Lalawigan sa Sugbo nga mao usab ang hinungdan nga panahon sa eleksiyon ang mga Oponganon dili na makaapil sa pagbotar og gobernador  ug bise gobernador.

Gikataho nga ang tumong sa padeklara nga special public holiday sa siyudad sa maong adlaw sa Hunyo 17 aron sa paghatag og kahigayonan sa mga Oponganon sa pagpakighiusa sa pagtambong sa pasiugdahang kalihokan sa kagamhanan sa siyudad. BDB BANAT NEWS