Mayor ug bise mayor sa siyudad sa Naga ug Carcar subling napili

CEBU, Philippines — Nanghawod ang magsuong Chiong sa Dakbayan sa Naga sa bag-o lang natapos nga piniliay.

Si mayor Valdemar Chiong nakakuha og 63,102 ka botos o 94 porsyento sa total number of votes.

Samtang ang iyang igsuon nga si Jing-Jing nga nagpapili nga bise mayor nakakuha og 56,942 ka botos.

Pulos sila moserbisyo sa ilang ikaduhang termino isip mayor ug bise mayor. Ang ila sab nga mga konsehales maoy nakasulod nga mao sila si Clint Isidro Chiong nga adunay botos nga 45,849, Amy Lara nga adunay botos nga 38,890, Domer Libor nga adunay botos 37,688.

Ang ikaupat mao si Aniceto Alinsonorin nakakuha og botos nga 35,998, Junjie Navales Cruz nga adunay botos nga 35,875, Charmaine Navarro nga adunay botos nga 35,872, Elmer John Lapitan nga adunay botos nga 35,707, Justino Dakay nga adunay botos nga 34,106, Ray Manabat nga adunay botos nga 31,905 ug si Letty Abangan nga adunay botos nga 31,415.

Ang ilang grupo mao ang Team Padayon Naga diin nagpasabot kini nga padayon sila sa ilang serbisyo sa Siyudad sa Naga.

Samtang pabilin gihapon nga mayor sa Dakbayan sa Carcar si Patrick Barcenas ug ang iyang bise mayor nga si Atty. Perkins De Dios human midaug sa eleksyon.

Si Barcenas ang gibiyaan sa iyang bise mayor kaniadto nga si outgoing vice mayor Efren Quijano kay miuban kini sa grupo ni Mercy Apura.

Naa lang sa unom ka nagpapili pagka konsehal ni Barcenas ang milusot nga mao sila si Rey Lawas, Bebe Barcenas, Inting Escobido, Roy Velez, Archilles Gantuangco ug si Jeson Fernandez.

Ang laing upat nga konsehal nga nakasulod gikan sa independenti ug sa grupo ni Apura nga mao sila si Eddie Alberca, Atty. Mich Amistad, Nice Apura ug Lorena Mae Tabora.

Nasayran nga kaduha na kahigayon nga nagbangga sa piniliay ang grupo ni Barcenas ug ni Apura. (BANAT NEWS)