PRO-7: 2025 midterm elections malinawon
CEBU, Philippines — Gihulagway sa Police Regional Office in Central Visayas (PRO)-7 nga generally peaceful ang dagan sa eleksyon kagahapong adlawa, Mayo 12, sa tibuok rehiyon, nga way natalang dagkong insidente o election-related incidents.
"Wala pa pong recorded yung officially election-related incidents. So zero po tayo don," gibutyag sa tigpamaba sa PRO-7 nga si Police Colonel Arvie Paraon-Bueno sa usa ka press conference gahapon.
Kini bisan pa man, dunay mga isolated incidents nga nataho sama sa giingong vote buying sa Carcar City, Sibonga ug sa probinsya sa Bohol.
Matud ni Bueno nga sa ilang pinakaulahing update dunay usa ka nadakpan gikan sa Carcar, City samtang padayon pa nga giimbestigahan ang ubang insidente nga nataho sa laing lugar.
Sa Cordova ug Mandaue City, duha ka mga lalaki sab ang nadakpan tungod sa paghupot og sobre nga dunay kwarta ug listahan sa kandidato.
Sumala sa Commission on Elections (Comelec)-7 nakalapas sila sa Comelec resolution bahin sa vote buying.
Samtang, duha ang gidakop tungod sa liquor ban, usa gikan sa Mambaling, dakbayan sa Sugbo ug laing usa sa Minglanilla.
Hangtud Mayo 10, 10 ka tawo ang nadakpan tungod sa gun ban diha sa Comelec checkpoint ug atol sa drug-enforcement operations, lima niini gikan sa Bohol samtang lima sab sa Cebu.
Matud pang Bueno ang tanang kapin 2,000 ka polling precincts sa rehiyon gi-monitor pinaagi sa Alternative Recording Devices (ARD) nga gimuntar sa mga polis diha sa maong mga lugar.
Kining ARDs nakakonekta sa Regional Election Monitoring and Action Center (REMAC) system maong makita nila real-time live-streaming ang nahitabo sa mga presinto. Karon pa kini gigamit nga teknolohiya sa PRO-7. Gibanabanang moabot kapin 68 milyones ang rehistradong botante sa Pilipinas karong tuiga, sila maoy modesider aron paghatag og kahigayonan pagpalingkod og bag-ong 12 ka senador, 63 party-lista, gatosan ka mga kongresista ug sobra 18,000 ka lokal nga mga opisyales sa nasud. (BANAT NEWS)
- Latest
