Mga aberiya sa voting machine nasinate sa eleksyon

CEBU, Philippines — Pipila ka mga kakulian ang nasinati sa mga botanteng Sugbuanon atol sa eleksyon kagahapon.

Usa na niini mao si kanhi Cebu City mayor ug mayoral candidate nga si Michael Rama kinsa nakasinati og ballot paper jam gikan sa voting machine diin wa mogawas ang resibo sa iyang presinto sa Guadalupe Elementary School.

Molanat ngadto sa 30 minutos ang gipaabot ni Rama aron nga hingpit nga matapos ang proseso sa pagbotar. Nalangan kini tungod kay nadugay og abot ang DESO technical support staff nga maoy moayo sa maong makina.

Ang mga magtutudlo nga anaa sa maong presinto niingon nga unang higayon pa nahitabo ang maong pagka-aberya sa voting machine.

Gisaysay sab ni Atty. Mikel Rama nga dili na sila kinahanglan nga mokwestyon pa sa Commission on Elections tungod kay gi-record na sab sa minutes sa polling place ang maong panghitabo.

Nakasinate usab sa susamang aberya ang voting machine sa Barangay Malubog diin nagpunsisok og hinuwat ang mga botante sulod sa usa ka classroom kun kanus-a maayo ang voting machine.

Ang Commission on Elections miklaro nga wala pay ebedensya nga ang automated vote counting machines (ACMs) mo-isyu ug resibo nga dili tukma sa actual nga gibotaran sa mga botante.

Dunay daghang mga botante nga mipadangat sa social media sa ilang reklamo diin matud pa ang migawas nga voter’s receipts wala motugma sa ilang actual nga gibotaran.

Sa laing bahin, pipila ka mga botante sa Lahug Elementary School sa Barangay Lahug ang mireklamo human nga nawala na ang ilang mga pangalan sa talaan sa mga botante. Ang pangulo sa Cebu-Citizens Involvement and Maturation for Peoples Empowerment and Liberation (C-CIMPEL) nga si Gloria Cuico mibutyag sa Banat News nga anaa ang mga pangalan sa mga mireklamo sa Computerized Voter’s List sa Voting’s Assistance Center apan wala na kini inig abot sa tagsa-tagsa ka mga presinto.

Giangkon sab sa mga botante nga nakabotar pa sila niadtong milabay nga piniliay niadtong 2022.

Mipasabot sab ang overall election officer sa COMELEC nga si Atty. Ferdinand Gujilde nga possible nga nabalhin ang ilang mga pangalan sa laing presinto apan anaa lang gihapon sa samang voting center.

Bisan pa man og gipaningkamutan nga mas han-ay ang pagkolekta sa gibana-banang 721, 469 ka mga Sugbuanon, gitug-an ni Atty. Gujilde dili gihapon perpekto ang sistema. (BANAT NEWS)