Senior citizens, PWD, mabdos sayong nangabot sa polling precinct

CEBU, Philippines — Mga alas 4:30 sa kadlawon kagahapon daghan nang mga senior citizen, Person with Disability ug mga mabdos ang nangabot diha sa Talisay National High School, Dakbayan sa Talisay aron mobotar.

Gisugdan ang botasyon sa alas 5:00 sa buntag kagahapon nga nakapalipay sa mga senior citizen ug nakapasayon sa ilang pagbotar.

Matud sa senior citizens nga mas maayo ang bag-ong panahon nga gihatag sa Comelec tungod kay bugnaw pa ug dili init ang hangin.

Usa ka babaye kinsa nagdumili sa pagpahingan nagkanayon nga naglaum siya nga ang bag-ong mga oras magpadayon hangtud sa umaabot nga mga eleksiyon.

Pipila lang ka minutos ang pagbotar sa mga botante kong andam na kini sa ilang iboto o adunay dalang lista sa ilang iboto.

Nabantayan nga susama usab niini ang kahimtang sa pipila ka mga tunghaan sa siyudad nga gigamit isip voting place diin ang mga hamtong, PWD ug mabdos ang gihatagan sa pagpasayon sa ilang pagbotar ilabi na sa unang duha ka oras nga gihatag kanila.

Atol sa pagbukas sa regular voting sa alas 7:00 sa buntag kong adunay mga senior citizen nga nangabot gitugotan gihapon kini nga makauna sa fast lane alang kanila. (BANAT NEWS)