PDL nihangop nga nahatagan og kahigayonan nga makabotar

CEBU, Philippines — Mga alas 12:00 pa sa udto kagahapon adlaw’ng Lunes, May 12, 2025 niabot na ngadto sa 54.10 porsyento ang turn-outs sa mga Person Deprived of Liberty ang nakabotar sa Central Visayas.

Matud ni Jail Chief Superintendent Neil Avisado, direktor sa BJMP-7 nga adunay 5,664 ka PDL ang rehistrado base sa datos gikan sa Bureau of Jail Management and Penology-7.

Gihulagway ni Avisado nga han-ay ug hapsay ang pagbotar sa mga PDL sulod sa mga jail facility diin ang ilang mga balota human nila og shade dalhon kini sa mga support group sa Comelec nga ubanan sa mga jail personnel ngadto sa mga eskwelahan kon asa nahimutang ang ilang barangay aron isulod sa Automated Counting Machine.

Hangtud sa oras niining pagtaho padayon pa ang pagkuha sa direktor sa gidaghanon ang nakabotar sa eleksiyon sa tibuok Central Visayas.

Samtang si Jail Chief Inspector Danilo Delgado sa Cebu City Jail Male Dorm, chief community relation sector nibutygag nga adunay 601 ka registered voter sa ilang facility gikan sa south ug north district sa Cebu City.

Matud ni Delgado nga adunay 38 ka PDL ang wala maka boto tungod kay wala niabot ang ilang mga balota sa maong facility.

Samtang mga alas 3:00 sa hapon hingpit nang nahatud ngadto sa mga tagsa-tagsa ka tunghaan ang maong mga balota.

Sa female dorm sa Cebu City Jail niabot ngadto sa 383 ka mga PDL ang nakabotar sa eleksiyon sulod sa maong facility.

Gikalipay nila tungod kay bisan og anaa sila sa sulod sa bilanggoan nahatagan sila og kahigayonan nga makapili kinsa ang ilang angayang ibutang sa pwesto. (BANAT NEWS)