P47 milyong shabu nasakmit sa LCPO
CEBU, Philippines — Nadakpan sa mga sakop sa Lapu-Lapu City Police Office ang usa ka bigtime drug suspect nga gikonsiderar nga high value individual sa kampanya batok ilegal nga drugas sa usa ka buybust operation sa Sitio Ibabao, barangay Agus diin nakuha ang P47 milyones nga gidudahang shabu.
Human sa usa ka semanang pagpaniid nadakpan sa mga sakop sa City Intelligence Unit, PDEA-7, ug RID7 ang 35- anyos nga si alyas Eme. Nakuha gikan niya ang napulo ka putos nga gituohang shabu nga moabot og 7,000 grams o pito ka kilo nga dunay standard drug price nga P47,600,000.00.
Kauban sa nakuha gikan niya ang usa ka backpack, usa ka cellular phone, ug usa ka tea bag nga dunay printang ‘Côte d’Ivoire.’
Si Police Regional Office-7 regional director Police Brigadier General Redrico A. Maranan miingon nga magpadayon ang hugot nga paggukod sa illegal drug operations sa rehiyon bisan paman sa eleksyon. Gidayeg sab niya ang mga sakop nga malampusong nakasakop sa maong suspek.
Si LLCPO director Lt. Col. Dyan Agustin miingon nga dili lang kini kalamposan sa law enforcement—kondili kadaugan sa mga Oponganon nga nagtinguha og kaluwasan, seguridad ug drug-free nga katilingban. — /IBM (BANAT NEWS)
- Latest
