SWMB nihangyo sa pagpalig-on sa mga polisiya sa basura

CEBU, Philippines — Ang Solid Waste Management Board (SWMB) niapelar sa Cebu City Council sa pagpahugot sa legislative measures alang sa pagpalig-on sa mga polisiya sa basura, apil na ang pagpatuman sa composting sa mga panimalay ug mga incentive schemes.

Sa labing uwahi nga regular nga sesyon sa konseho, ang SWMB nagpadala og suwat nga nangayo og suporta sa konseho alang sa solid waste management program sa dakbayan. Ang sulat gipirmahan ni Maria Emma Ramas, Alternate Chairman sa board.

Sa maong suwat, gitug-an nga ang panawagan alang sa suporta subay sa ilang giduso nga pagpalig-on sa solid waste management system sa dakbayan ug ilakip ang nasudnong mga polisiya.

Lakip sa ilang sugyot mao ang pag-amendar sa Ordinance 1361, nga nailhan usab nga Anti-Littering Ordinance. Ilang gisugyot nga i- review ang ordinansa aron kini mas angayan sa kasamtangang panahon ug klaro nga malatid ang mga responsibilidad sa pagmintinar sa kalimpyo alang sa pagdumala sa basura sa matag panimalay, pribadong establisamento, ug institusyon.

Nanawagan sab sila sa usa ka pag amenda sa Ordinansa 2031, nga nailhan usab nga "No Segregation, No Collection". Girekomenda nila ang pagpalig-on sa pagpatuman niini pinaagi sa pagpaila sa usa ka sistema sa mga merits ug demerits aron madasig pa ang pagsunod.

Gisugyot usab nga ang Environmental Sustainability Action Plan, ilabina kadtong mga aspeto nga may kalabutan sa solid waste management, nga himoon kini mandatory.

Ila usab nga girekomendar nga ang solid waste management isipon nga legal ug operational dili lang isip usa ka “public service,” kon dili isip usa ka importante nga environmental concern.

Nanawagan usab ang SWMB alang sa mandatory nga pag-compost, samtang tugotan nga i-outsource kini nga mga serbisyo.

Subay niini, alang niadtong dili makahimo o dili gustong mag-compost, ang SWMB misugyot og kapilian mga mamahimo kini nga i kontrata sa mga sa duly accredited composting providers.

Ang SWMB nanawagan alang sa paghiusa sa mga facility sa basura sa mga plano sa pagtukod ug subdivision. Aron makab-ot kini, ilang girekomendar ang pag-require sa Office of the Building Official (OBO) nga magmando sa paglakip sa Materials Recovery Facility (MRF) ug composting facility sa pagdesign sa bag-ong mga edipisyo nga nag-apply og building permit.

Ilang gihangyo nga iapil sa Department of Human Settlements and Urban Development (DHSUD) ang samang requirement sa mga designs sa mga subdivision nga mag- apply og development permit.

Lakip sa gihangyo ang pagpaila sa usa ka incentive scheme alang sa mga barangay nga malampusong nagpatuman sa solid waste diversion programs aron nga maminusan ang gidaghanon sa mga basura nga ihatod sa mga landfill ug ipaubos ang budget sa dakbayan alang sa mga aktibidad sa pagkolekta ug paglabay.

Ang samang incentive scheme gisugyot usab alang sa mga sa pribadong sektor. — /MEL (BANAT NEWS)