Palma: Botar giniyahan sa konsensiya

CEBU, Philippines — Si Cebu Archbishop Jose Palma niawhag sa mga botante sa pagbotar giniyahan sa ilang konsensya.

Kini ang giluwatan sa arsobispo atol sa ika- 140 ka tuig nga anibersaryo sa pagkatukod sa Parokya ni San Roque de Montpellier, sa Lungsod sa Asturias, Cebu.

Ang arsobispo nihatag og gibug-aton sa kamahinungdanon sa pagbotar giniyahan sa konsensya ug dili sa bulsa sa umaabot nga lokal ug nasudnong piniliay karong Lunes.

Si Palma nanawagan atol sa eleksyon unahon gayud sa pagtan-aw sa mga botante ang mga politiko nga magdala og kaayohan sa nasud.

Malaumon ug maampoon siya alang sa usa ka limpyo, matinud-anon ug malinawon nga eleksyon.

Gipadayag ni Palma, dungan nga pagkapili sa bag-ong Santo Papa usa ka pagpahinumdom sa katawhan sa kamahinungdanon sa pagpangita sa giya sa Diyos (Espiritu Santo) sa pagpili nila sa mga mabutang sa katungdanan.

Sa pikas bahin,  ang  Commission on Election andam na karon adlaw nga Lunes, Mayo 12, 2025 para sa Local and Midterm Elections ug nipahimangno sa katawhan sa mga angay ug dili angay nga buhaton.

Giya sa Comelec

Ang Comelec nipahibalo alas singko sa kadlawon ngadto sa alas siete sa buntag mao ang gitawag og Early Voting Hours exclusive para sa mga senior citizens, persons with disabilities og mga buntis nga botante.

Samtang alas siete sa buntag ngadto sa alas siete sa gabii mao ang Regular Voting Hours para sa tanan.

Gipahibalo sa Comelec aduna usab silay gipahimutang nga Express Lane sa Regular Polling Places ug Priority Polling Place alang sa mga Senior Citizens, PWD, IP, escorted Person Deprived of Liberty na mga botante. IBM BANAT NEWS