Pipila ka lungsod Mamaligya na og P20/kg bugas

CEBU, Philippines — Pipila ka lungsod sa Probinsya sa Sugbo ang opisyal na nga nilusad sa P20 matag kilo sa rice program kagahapong adlawa.

Sa lungsod sa Daanbantayan, ang mga benefeciaries niini gilimit lang sa sa 10 kilos matag semana ang mamahimong mapalit apan limitado pud sa usa ka beneficiary matag panimalay.

Ang prayoridad nga mga benepesaryo mao ang mga persons with disabilities (PWD), solo parent ug senior citizens.

Samtang ang "eligible recipients" mao ang Barangay Health Workers (BHW); Barangay Nutrition Scholars (BNS); Day Care Workers (DCW); GAD Focal Persons; BAHA Members; Barangay Tanods; Lupong Tagapamayapa Members; Traffic Enforcers; Public School Teachers (Teaching and Non-Teaching Staff); DRRM Personnel; Bantay Dagat Volunteers; Public Hospital Workers; Barangay Officials ug ubang indibidwal nga nanginahanglan.

Ang matag benefeciary gi-require nga ipakita ang ilang QR -coded card alang sa verification.  Ang bayad direkta na sa authorized personnel ug ang resibo i-issue isip proof of payment.

Aron makakuha pud og QR coded beneficiary card kinahanglan mosumiter sa national ID o bisag unsa mga valid ID ngadto sa Municipal Social Welfare and Development Office (MSWDO) alang sa pag proseso.

Sa lungsod Malabuyoc, nagsugod na pud ang pagbaligya sa 20 matag kilo nga bugas pinaagi sa Sugbo Merkado Barato niini didto sa maong lungsod kagahapong adlawa.

Ang National Food Authority nipahibalo nga andam na sila sa pagpatuman sa maong programa ni Presidente Ferdinand "Bongbong" Marcos Jr.  nga ilusad sa Visayas karong semanaha.

Matud pa ni Olma Marie Bayno-Nedia ang tigpamaba sa NFA, nag-alayon sila sa Department of Agriculture isip maoy lead agency sa maong programa pinaagi sa FTI (Food Terminal Incorporated).

Dugang pa ni Nedia, ang LGU makig coordinate sa DA pinaagi sa Food Terminal Incorporated (FTI) kay sila man ang naay Memorandum of Agreement.

Sumala pa ni Nedia, gawas sa ilang stocks nga anaa sa ilang bodega karon, aduna usab silay gipaabot nga rice shipments gikan sa ubang rehiyon.

Gitug-an ni Nedia, sa pagkakaron ang probinsya sa Sugbo nitawag na sa ilang buhatan aron sa pagsusi kung kanus-a sila posible maka withdraw sa stocks. Sa pagkakaron wala pa silay gipagawas nga bugas kay nagpaabot pa sila sa mga dokumento kay dili man sila basta-basta maka release kung wala kini. Matud niya dili mominos sa 11 mil ka sako sa bugas ang naa sa ilang mga bodega karon.

Ang Cebu Provincial Government nakahatag na og listahan ug ang LGU na ang mokuha niini sa warehouse sa NFA sumala pa ni Nedia.

Sa pikas bahin, tun-an pa ni Cebu City Mayor Raymond Alvin Garcia ang rollout sa P20 nga kilo sa bugas sa dakbayan, kini bisan pa og ang ubang LGUs sa Sugbu nagsugod na pagbuhat niini.

Matud ni Garcia kinahanglan pa niya nga tun-an ang guidelines niini aron dili kini makasupak sa unsay nakalatid sa programa.

“I have to seek clarification on where to get the rice, how to sell the rice, to whom to sell the rice, where to sell the rice… all of these details I have to find out first before I can actually implement it but there should be no reason not to include Cebu City,” suma pa ni Garcia atol sa press conference.

Matud pa ni Garcia nga kun masayran na niya ang kinatibuk-ang guidelines moluwat siya og Executive Order aron nga adunay dokumentasyon nga lakip ang syudad sa programa sa Presidente. — Rowena Capistrano, Preciosa L. Bacalso (BANAT NEWS)