Suspek sa suway nga pagtulis gipasakaan og kaso

CEBU, Philippines — Gipasakaan og kaso nga robbery sa kapolisan ang usa ka 41 anyos nga lalaki nga suspetsado sa pagsuway unta og tulis sa usa ka babaye diha sa sitio Agay-ay sa Barangay Poblacion, Lungsod sa Liloan.

Ang gipasakaan og kaso ngadto sa piskalya sa siyudad sa Mandaue mao si Chenly Hicotmingao, ulitawo nga taga Barangay Poblacion sa maong lungsod. Ang Liloan Police Station nga gipangulohan sa hepe nga si Police Major Mawi Arcilla, mitanggong karon sa maong suspetsado sulod sa ilang detention cell.

Una niini ang biktima sa suway unta nga pagtulis mao ang 27 anyos nga si Jennely nga naglakaw sa nahisgutang dapit padulong na mopauli niadtong Sabado sa gabii dihang kalit gibunalan sa suspek sa gidala niini nga kahoy.

Apan maayo gani kay natapsingan lang ang biktima og nakahigayon sa pagdagan ug pagpangayo og tabang sa mga molopyo nga naalarma ug dali nga nakagawas sa ilang panimay hinungdan sa iyang pagkasikop.

Girekomendar sa piskaliya nga makabutang og pyansa ang suspek nga mokabat sa P100,000 alang sa iyang temporaryong kagawasan. (BANAT NEWS)