Tulis o kaaway, gisubay sa MCPO sa kamatayon sa lalaking car dealer

CEBU, Philippines — Padayon ang kapulisan sa Dakbayan sa Mandaue sa pagsusi kung kinsay nagpaluyo sa kamatayon sa usa ka lalaki nga nakit-an wala nay kinabuhi sulod sa sakyanan nga gimeneho niini sa may Zuelleg Avenue. NRA, Barangay Subangdaku Mandaue City, alas-6 sa buntag adlaw nga Domingo.

Si Police Lieutenant Colonel Mercy Villaro, tigpamaba  sa MCPO miila sa namatay nga mao si Imanoden Managgiring H.  Rasul, nagtrabaho isip car dealer ug nagpuyo sa Siyudad sa Sugbo.

Sa pagsusi sa SOCO sa lawas niini, nasuta nga nakabaton kini og duha ka mga samad pinusilan sa luyong bahin sa iyang ulo nga gituohang maoy hinungdan sa hinanaling kamatayon.

Si Villaro miingon nga duna na silay  Person of Interest (POI) sa maong krimen nga nahitabo.

Gisusi nila ang anggulo nga personal grudge o tulis ang motibo tungod  kay  nawagtang man ang cellpone ug pitaka sa biktima.

Wala usab nila gisalikway ang posibilidad nga adunay nakaaway ang  biktima.  Gisubay na nila ang mga CCTV  footage  sa palibot aron makatabang sa ilang imbestigasyon ug pagsusi sab sa koneksyon sa  ilang POI.

Si Villaro miingon nga ang TEAM enforcers nga si Jonathan Cabatingan nga nahiagi  sa maong lugar maoy unang nakadiskubre  sa maong patay’ng lawas sa biktima nga naglingkod  sa  sulod sa iyang sakyanan  nga   nag-atubang sa manobela.

Gidala ang patay’ng lawas sa Rolling Hills sa Barangay Banilad apan wala na kini ma-outopsy tungod kay gipalubong kini dayun sa mga kabanay subay sa tinuohan sa Islam. (BANAT NEWS)