74-anyos napunggit sa multicab patay

CEBU, Philippines — Patay ang usa ka 74-anyos nga lalake human nabanggaan og Suzuki Multicab Pick-up samtang naglakaw sa Purok 6, Barangay Cambinocot, dakbayan sa Sugbo niadtong Domingo sa gabii, Abril 27, 2025.

Ang biktima mao si Hilario Auman Limotan, nagpuyo sa Purok 6, Barangay Cambinocot ning siyudad.

Samtang ang nakabangga kaniya mao si Benjie Maunes Ardita, 41-anyos, nagpuyo sa Sitio Kang-Atis, Barangay Lusaran, Cebu City.

Base sa imbestigasyon sa Traffic Enforcement Unit Cebu City Police Office naglakaw sa naasoy nga dapit ang biktima samtang ang sakyanan nagbiyahe paingon sa Lusaran area.

Pag-abot sa naasoy nga lugar giingong nabanggaan sa sakyanan ang biktima hinungdan sa pagkatumba niini ug nakaingon sa iyang kamatayon.

Samtang tulo ka  tawo sab ang naangol human sa karambola sa mga sakyanan diha sa National Road, Sitio Lower Cambuntan, Poblacion 2, Dakbayan sa Carcar, kagahapon sa kadlawon, Lunes, Abril 28, 2025.

Ang mga sakyanan nga nalambigit sa aksidente gilangkuban sa Isuzu 10- wheeler truck; Volkswagen JETTA 2.0 TDI M sedan color black pearl ug gimaneho ni alyas Abigail, 30 anyos, taga Barangay Pajac, Dakbayan sa Lapu-Lapu; Nissan Sentra sedan color white nga gimaneho ni alyas Mark, 43, residente sa Barangay Paknaan, Mandaue City; Hyundai l10 GLS 1.2L MT sedan color blue, ang driver mao si alyas Ren-ren, 42, taga Barangay Tabok, Mandaue City ug Nissan Navarra 2.5L EL pick-up type color savanna orange nga gimaneho ni alyas Cris, 63 , taga Talisay City.

Samtang ang mga naangol mao ang sakay sa Hyundai nga si alyas Jacque,; driver nga si alyas Cris; ang drayber sab nga si Cris ug kaubang si alyas Margie, 54, luwan sa Nissan Navarra.

Base sa imbestigasyon sa Carcar City Police Station ang Isuzu 10- wheeler truck naka-park kilid sa dalan.

Samtang ang Volkswagen, Nissan sentra sedan ug Hyundai I10 GLS 1.2L MT sedan gabiyahe gikan sa Dumaguete City paingon sa Cebu City ug nipadaplin sumpay sa maong trak.

Ang Nissan Navara gabiyahe gikan sa Negros paingon sa Talisay City apan pag-abot sa naasoy nga dapit, base sa pamahayag sa driver sa Nissan Navara nga si Cris , nakatagpilaw tungod sa iyang medical condition.

Hinungdan nga nadaro niya ang upat ka mga sakyanan diha sa daplin.

Samtang nagtinabangay ang mga sakop sa Highway Patrol Unit-7 ug mga lokal nga residente pagluwas sa usa ka babayeng nagmtorsiklo nga nalahus og katagak sa pangpang sa Transcentral Highway, sa Sitio Cantipla, Barangay Tabunan, dakbayan sa Sugbo niadtong Domingo sa hapon, Abril 27, 2025.

Ang babaye 19 anyos, nagpuyo sa Barangay Day-as, Cebu City ug ang gimaneho nga motorsiklo kay Honda Click 125.

Matud pa niini nibasiyo ang brakes sa iyang motor ug ni-overshoot siya pagkurbada maong natagak sa pangpang.

Ang HPG-7 pinangulohan ni Police Lieutenant Jomar Ybañez, Team Leader sa PHPHT Cebu (West) daling miresponde ug gitabangan ang biktima.

Nigamit kini og pisi ug gibaba ang biktima inabagan sa mga tawo  aron masaka sa mga polis ang biktima ug nadala og ambulansiya sa tambalanan. (BANAT NEWS)