Handheld radio nga dunay internet gigamit sa kapolisan sa Talisay
CEBU, Philippines — Bag-ong kahimanan ang gigamit karon sa kapolisan sa Siyudad sa Talisay aron makahatag og nindot nga serbisyo.
Ning bag-ohay lang gibansay ang mga sakop sa Talisay City Police Station kung unsaon paggamit ang handheld radio nga adunay internet.
Ang kapolisan naanad sa frequency nga handheld radio pero adunay higayon o lugar nga deadspot sa maong matang sa kahimanan.
Busa pinaagi sa handheld radio nga adunay internet masulbad ang ilang problema sa komunikasyon ilabi na kung naa sila sa dapit nga deadspot kun way signal.
Si Police Lt. Col. Maila Maramag, hepe sa kapolisan sa Talisay niingon nga ang ilang programa nagsubay sa gipatuman sa Police Regional Office (PRO-7) pinangulohan ni Police Brigadier General Rederico Maranan.
Si Maramag nitataw nga kung paspas ang komunikasyon mas paspas sab ang ilang pagtubag sa bisan unsa nga alarma.
Gawas sa pagbansay sa bag-o nila nga kahimanan gitudlo sab sa kapolisan ang pamatasan sa paggamit sa radyo aron dali sila nga magkasinabtanay. (BANAT NEWS)
- Latest
