911 Hotline gilusad sa Tagbilaran City sa Bohol

CEBU, Philippines — Sa labing unang higayon sa Bohol gilusad sa Tagbilaran City ang 911 Hotline para mas mapasayon sa tanan sa higayon nga dunay motumaw nga emerhensya.

Ang paglusad sa 911 hotline sa Probinsiya sa Bohol usa ka dakung lakang alang sa efficient emergency response.

Gipangulohan sa Tagbilaran City Disaster Risk Reduction and Management Office (CDRRMO) ang maong inisyatiba nga nagtinguha sa pag streamline sa emergency services sa tibuok siyudad nga walay bayad.

Matud pa sa Officer sa CDRRMO Emergency Communication Units Emmanuel Supremo, pipila na ka mga emergency calls ang ilang nadawat sukad gilusad ang hotline niadtong April 25, 2025.

Dugang pa ni Supremo, atol sa ilang paglusad sa 911 hotline nabatyagan nila nga paspas ug efficient ang ilang pagtubag sa mga alarma nga ilang nadawat.

Ang siyudad nigahin og P6 milyones alang sa maong proyekto.

Sa pagkakaron subay sa paglusad sa 911 hotline aduna usab dili mominos sa 14 ka mga yellow phone ang gipahimutang sa mga strategic nga mga dapit nga mas mapasayon sa mga tawo.

Ang mga yellow phone direkta kini nga makatawag sa emergency hotline ug mahimo ra usab dayon masayran kung adunay maghimo ug binoang nga tawag tungod kay aduna man usab CCTV Camera nga nakatutok niini.

Si Dice Arcenal-Luspo, ang Tourism Officer sa siyudad nibutyag nga daku kini nga tabang ilabi na kay daghang mga langyaw nga turista nga mobisita sa ilang siyudad.

Pinaagi sa paggamit sa maong hotline dili na kinahanglan ang load ug data alang sa tawag tungod kay makakonektar ra ang yellow phone ngadto sa command center aron dali nga marespondihan sa mga otoridad. (BANAT NEWS)