Viscom hugot ang kampanya sa seguridad nonot sa eleksyon

CEBU, Philippines — Aron mosaka ang morale sa kasundaluhon ug masustiner ang effective command and control si Lieutenant General Fernando Reyeg, Commander sa Visayas Command nibisita sa mga units sa Eastern Visayas.

Ang mga units nga gibisita sa maong opisyal mao ang Headquarters sa 803rd Infantry Brigade sa Catarman, Northern Samar; Headquarters sa 87th Infantry Battalion sa San Jose De Buan, Samar; ug Headquarters sa 8th Infantry Division sa Catbalogan City, Samar.

Tinguha sa maong inisyatiba nga ma-assess ang nagpadayon nga security ug stability campaign sa Eastern Visayas ingon man ang kaandam sa mga tropa nga gitahasan alang sa umaabot nga 2025 National ug Local Elections.

Atol sa pagbisita ni Lt. General Reyeg, personal kining nakighinabi sa mga tropa ug iyahang gidayeg sa exemplary performance sa trabaho ug giawhag nga i-sustenir ang nasugdan.

Gihimug-atan sab niini ang importante nga role sa Armed Forces of the Philippines isip suporta sa Commission on Elections ug Philippine National Police atol sa piniliay.

"Let us provide an environment where our people can exercise their right to vote freely without fear or intimidation. Let us uphold the highest standards of service and ensure the success of this democratic process", suma ni Lt. General Reyeg.

Moabot sa 2,848 personnel ang naka alerto, andam mo-assist sa COMELEC ug PNP aron masiguro ang patas, hapsay ug kasaligan nga eleksyon.

Highlight sa maong pagbisita ang recognition kun pag-ila sa 25 ka Officers ug Enlisted Personnel sa ilahang exemplary service.

Gilangkuban kini sa pito nga gipasidunggan isip Gold Cross Medal for gallantry in combat, unom ang nakadawat og Silver Cross Medal for exceptional achievements in special operations, ug 12 ang gihatagan og Gawad sa Kaunlaran Medal for their significant contributions to socio-economic development. (BANAT NEWS)