Ika-504 nga kasaulogan sa Battle of Mactan gihugopan

CEBU, Philippines — Gihugopan sa pagsaksi sa mga Oponganon ug mga dumoduong ang gipahigayon nga reenactment sa Battle of Mactan sa ika-504 nga kasaulogan sa Kadaugan sa Mactan kagahapon, Abril 27, 2025 taliwala sa naglagiting nga kainit sa adlaw .

Karong tuiga Si Shaun Pelayo, usa ka actor ug model ang nidala sa papel ni Datu Lapu-Lapu ug ang iyang asawa nga si Carissa “Habibi” Liaging ang nidala sa papel isip Rayna Bulakna.

               Si Police Lieutenant Christian Torres, tigpamaba  sa Lapu-Lapu  City Police Office (LCPO) nibana-bana nga kapin sa 5,000  ka tawo nga nisaksi sa maong kalihokan.

Matud ni Torres nga gatusan usab ka polis ang ilang gitahasan sa pagbantay sa maong kalihokan alang sa pagpatuman sa kahapsay ug kalinaw

Gibutyag ni Torres nga nakasinati lang og gagmay nga kakulian dihang human sa gipahigayon nga reenactment ang mga  nanan-aw nga didto  sa gawas ang nakahigayon sa pagsulod sa pagpaduol sa entablado nga naghugyaw sa  pagpahulagway kang Datu Lapu-Lapu ug Rayna Bulakna

Si Gary Lao, tourism officer sa siyudad nipadayag sa iyang kahinangop sa kalamposan sa gipahigayon nga reenactment sa Battle of Mactan

Ang reenactment karong tuiga giapilan usab kini sa gatusan ka mga eskrimador nga Oponganon nga naglakip sa bata ug hingkod kinsa nagsilbing mga sakop ni Magellan ug  Datu  Lapu-Lapu ang nipakita usab  sa ilang kahanas  sa arnis gamit ang olisi batok sa sundang nga gigamit sa mga sakop ni Magellan. (BANAT NEWS)