Mga digital radio sa Cebu City wala giuli

CEBU, Philippines — Giklaro ni Cebu City Mayor Raymond Alvin Garcia nga wala siya namasangil ni kanhi Cebu City mayor Michael Rama kabahin sa mga Motorola Digital Radio nga wala giuli sa 17 ka kanhi empleyado sa city hall.

Gikataho nga ang mga digital radio nga iya sa kagamhanan gigamit kini sa pagpapangampaniya diin ang Cebu City Disaster Team nakadawat og komunikasyon gikan sa usa ka gipahigayon nga pulong-pulong gamit ang mga digital radio.

Ang 17 ka empleyado gilangkuban nila ni Elmer Mandanat, Noel Saciedo, Generous Flores Gonzales, Philipps John Singson, Angelo Zambo, Christ Mark Garma, Winston Nogra, Roger Luna, Archie Dereche, Mark Anthony Sayaboc, Dinnes Napoles, Emilio, Acquizar, Kevin Sanchez, Roland Parawan, Jesena Teresita, ug Guy Unabia.

Matud ni Garcia nga igo lang niya nahisgotan ang pangalan ni Rama tungod kay mga empleyado kini niya ubos sa iyang termino.

Tumong ni Garcia nga si Rama na ang mopahimangno sa mga kanhi empleyado nga iuli ang mga digital radio. 

Ang maong mga indibidwal gihatagan kini og 72 ka oras aron sa pag-uli sa nahisgutang mga digital radio.

Gikataho nga posibleng mapasakaan og kaso ang naghupot  sa maong mga ekipo nga iyang sa gobiyerno. (Preciosa L. Bacalso/BDB)

Cebu City mokuha og arcihiologist inig trabaho sa underground cable

Si Cebu City Mayor Raymond Alvin Garcia nagkanayon nga kinahanglan nga mokuha og archeologist sa higayon nga trabahuon na ang pag-instolar sa mga underground cable sa Plaza Sugbu, City Hall, ug Basilica Minore del Santo Niño aron  mapreserba kon adunay makita nga mga artifact.

“We are very careful about it kay considering nga heritage nana, kay naa nya ta’y makit-an sa ilawom nga mga artifacts”, matud ni Garcia.

Gimandoan na usab ni Garcia si Konsehal Jerry Guardo nga mokuha og archeologist sa tibuok operasyon.

Usa ang underground cable project sa gilusad ni Garcia niadtong buwan sa Marso nga naaprubahan niadtong Agosto 2024.

Ang tulo ka iladong lugar sa siyudad mao ang unahon sa pagtrabaho diin pangtangtangon ang mga spaghetti wires aron mamentinar ang makasaysayanong importansiya nga gibilin sa mga katiguwangan.

Apan gibutyag ni Guardo nga adunay gamay nga paglangan sa pag-instolar sa mga kable sa maong mga dapit tungod kay kasamtangang gihikutar ang mga resikitos aron nga makakuha kini og permit. (BANAT NEWS)