Manag-uyab nga mangingilad dakpan

CEBU, Philippines — Manag-uyab nga mangingilad ang nadakpan sa kapolisan sa Dakbayan sa Talisay diha sa Purok Lasco, Barangay Lagtang niadtong Biyernes sa hapon.

Ang mga suspetsado mao sila si Joel Bastida, 48-anyos, taga Davao City ug ang iyang uyab nga si Julita Abendan, 51-anyos, taga Lungsod sa San Fernando.

Ang kapolisan sa Dakbayan sa Talisay nakadawat og reklamo gikan kang alyas “Celestino”, 79-anyos, taga Barangay San Isidro sa nahisgutang siyudad.

Nisumbong ang biktima sa kapolisan nga lima ka mangingilad ang nagtinabangay sa pag-ilad kaniya diha sulod sa blue nga awto.

Iyang nahatag ang iyang kwarta ug alahas sa bag ug gipakanaog siya diha sa Barangay Tabunok samtang nipasalig kaniya ang mga suspetsado nga balikon siya.

Sa pag abli niya sa bag pulos mga budol money ang sulod niini hinungdan sa iyang pagpakitabang sa kapolisan.

Atol sa hot pursuit operation kapolisan nailhan ang sakyanan sa mga suspetsado hangtud nga nadakpan kini.

Ang tulo ka suspetsasdo nakasibat kini apan ang manag-uyab ilang nadakpan kinsa nakuhaan og mga alahas nga gituohan nga iya sa biktima, usa ka kalibre .45 nga armas, usa ka kalibre .38 nga revolver, nagkalain-laing ID, writing pads nga gihimo nga budol money ug shabu nga nitimbang og 5.5 gramo.

Gikatahong ang mga suspetsado nangangkon nga sila maoy responsable sa pagpangilad diha sa Lungsod sa Moalboal niadtong Abril 6, 2025, sa Lungsod sa Dalaguete niadtong Abril 9, 2025 ug sa Dakbayan sa Toledo niadtong Abril 13 niining tuiga.

Si Police Lieutenant Colonel Maila Maramag, hepe sa kapolisan sa Dakbayan sa Talisay nagkanayon nga ang grupo sa mga suspetsado naghimo sa ilang modus nationwide diin 15 kanila ang nailhan na.

Matud ni Maramag nga ang grupo mogamit og nagkalain-laing mga sakyanan aron sa paghimo sa ilang modus.

Ang mga suspetsado natingkagol karon sa prisohan ug gikatakdang pasakaan og tukmang kaso sa ilang kalapasan. (BANAT NEWS)