Suspect sa pagpusil patay sa usa ka babaye sikop

CEBU, Philippines — Gituman sa Police Regional Office-7 ug Cebu City Police Office nga masulbad ug mahatagan og hustisya si Frince Ordeñiza, ang babaye nga gipusil patay diha sa J. Luna Street corner Smart Loop, Barangay Luz niadtong Abril 14, 2025 sa dili pa kini ilubong karong adlawa, Domingo, Abril 27, 2025.

Sulod sa duha ka semana nadakpan sa kapolisan ang nagpusil patay sa biktima diha sa Sitio Marna, Barangay Mabolo, Dakbayan sa Sugbo niadtong Biyernes sa gabii, Abril 25, 2025.

Ang suspetsadong gunman mao si Russel Niño Zapeda, 24-anyos, nagpuyo sa Barangay Casili, Lungsod sa Consolacion.

Ang biktima kinsa 24-anyos ang panuigon lumad kini nga taga Barangay Bahay, Lungsod sa Sibonga apan nag-boarding house diha sa Barangay Luz tungod kay nagtrabaho kini sa Cebu City.

Niadtong Abril 14, 2025 gikan sa boarding ang biktima nisakay kini og motorsiklo padulong motrabaho diha sa usa ka mall sa South Road Properties (SRP).

Nihunong ang gisakyang motorsiklo sa biktima tungod kay stop ang signal light diin niabot ang suspetsado nga nagmaneho og NMax nga motorsiklo ug nitupad sa biktima.

Dihang “Go” na ang signal light ug nasiguro sa suspek nga mao to ang iyahang target gipusil niya ang biktima sa ulo tulo ka higayon.

Ang biktima gidala kini sa tambalanan apan nakabsan gyud sa kinabuhi.

Ang kapolisan sa Mabolo pinangulohan ni Police Major Romeo Caacoy, Jr. ug Criminal Investigation and Detection Unit (CIDU) nipahigayon og imbestigasyon sa hitabo.

Gikataho nga Sa usa ka balay sa M. Garces Street, Barangay Mabolo gibilin ni Zapeda ang NMax nga motorsiklo.

Human niya gibilin ang motorsiklo ang suspetsado kinsa nagsul-ob og color puwa nga longsleeve nga iyaha sa usa ka ride-hailing app ingon man karsones ang nag-ilis og itom nga sinina ug short pants.

Nisakay ang suspetsado sa nakaparada nga sakyanan nga Toyota Wigo nga nagsilbing getaway vehicle.

Nasakmit sa kapolisan gikan sa suspetsado ang kalibre .38 nga revolver nga adunay tulo ka buhing bala ingon man granada.

Gikataho nga giangkon sa suspetsado ang krimen ug giingong gibayran siya og P20,000 bugto sa pagpusil patay sa biktima.

Giabangan ra niya ang motorsiklo ug sakyanan nga gigamit sa krimen ug ang armas gipagamit ra kini kaniya ug dili siya konektado sa ride-hailing app.