Bantayan mangutang og P300 milyong alang sa water improvement project

MANILA, Philippines — Ang lokal nga kagamhanan sa Bantantayan nagtinguha sa pagsulbad sa problema sa tubig sa lungsod.

Ug gumikan niini, ang LGU nagkinahanglan kining mo-loan og P300 milyones alang sa water improvement project sa lungsod.

Sa usa ka pahibalo sa LGU pinaagi sa Facebook page niini kagahapong ang Bantayan nagkanayon nga kinahanglang padak-an sa lungsod ang tinubdan sa tubig o reservoir niini nga ibutang ngadto sa Barangay Atop-Atop.

Matud sa Bantayan LGU nga sa P300 milyones nga utangon, P225 milyones niini ang alang sa papadako sa tinubdan sa tubig, pagtukod og pumping stations ug pagbutang og mga dagkong tubo nga mokatay sa tibuok lungsod.

“Aron masugdan unta dayon kining importante ug labing gikinahanglan nga proyekto nga ikaayo sa tanang Bantayanon, gikinahanglan nga mo-loan ang munisipyo og 300 million pesos sa Landbank”, matud sa LGU pinaagi sa ilang Public Information Office.

Ang nahibilin nga P75 milyones gamiton usab sa pagbutang og water desalination plants aron makasupaly og tubig sa mga isla sa Lipayran, Botigues, Hilotongan, Doong ug Luyongbaybay aron dili na maglisod pagbiyahe ang mga tawo sa mainland aron mopalit og tubig. 

Ang Bantayan LGU nagkanayon nga nalangay ang pagpatuman sa maong proyekto tungod kay adunay nibabag niini sa konseho.  Hinuon naaprobahan na kini sa mayoriya sa konseho ug karon gihan-ay na ang mga proyekto aron mapatuman ang water system improvement project sa LGU.