Mga nasunogan sa brgy lahug makabalik na og tukod

CEBU, Philippines — Gihatagan na og entry permit ang mga biktima sa sunog sa sitio San Vicente Ferrer sa barangay Lahug, nga makatukod pagbalik sa ilang mga panimay sa luna nga gipanag-iya sa Kapitolyo.

Ang Division for the Welfare of Urban Poor (DWUP) mihatag sa 42 ka entry permits ngadto sa mga fire victims nga makabalik sa orihinal nga gitarukan sa ilang mga panimay.

Kining maong kalambuan natigayon human nitugot si Governor Gwen Garcia sa hangyo sa kagamhanan sa dakbayan sa Sugbo nga tugtan ang mga fire victims nga makabalik sa pagtukod sa luna nga gipanag-iya sa probinsya sa Sugbo.

Si Mayor Raymond Garcia mitambong usab sa kalihukan uban ni city councilor Joel Garganera ug Lahug Barangay Captain Hazel Ann M. Empleo.

Gipasalamatan ni Garcia ang mga biktima sa sunog gumikan sa ilang pasensya sa pagpaabot sa bag-ong kalambuan sa ilang kahimtang.

“Daghang salamat sa inyong pasensiya, sa inyong paghuwat og dugay, pagpaminaw, ug finally ang inyong…willingness bitaw nga you will be able to buy or purchase your own land. Importante kani atong buhaton dili lang ni para nato, para pod ni sa atong mga anak ug atong mga apo, nga finally you will live and sleep in homes that you own,” Matud ni mayor Garcia.

Kahinumduman ubay ubay ang mga pamilya nga nawad-an sa ilang mga panimay sukad niadtong buwan sa Pebrero ning tuiga human miulbo ang sunog sa nahisgutang dapit.

Dugang niini si Governor Garcia mitanyag nga ibaligya ang luna ngadto sa mga fire victims pinaagi sa Pag-ibig   Fund.

Si Rose Dianne Rensulat, presidente sa San Vicente Homeowners Association miingon nga nagpaabot na lang sila sa mga representante sa Pag-IBIG Fund aron tukion ang kabahin sa ilang loan. (BANAT NEWS)