Garcia niawhag sa CCLEC paghatag og representasyon sa probinsiya

CEBU, Philippines — Subling niawhag si Gobernador Gwendolyn Garcia ngadto sa Cebu-Cordova Link Expressway Corporation (CCLEC) nga mahatagan og representasyon ang Probinsiya sa Sugbo sa Toll Regulatory Council (TRC).

Atol sa tigom ni Garcia tali ni CCLEC President ug General Manager Allan Alfon ug Cordova Mayor Cesar Suan, ang gobernador nagkanayon nga kinahanglan nga mahatagan og tingog kalabot sa pagdesisyon sa toll collection sa CCLEX.

Kini gumikan kay mayoriya sa mga naggamit sa CCLEX ug nagbayad sa toll fees mga konstituwnete sa Probinsiya sa Sugbo sama sa mga residente sa Lungsod sa Cordova.

Sa pagkakaron ang TRC gilangkuban lang sa lima ka miyembro  diin tulo ang appointed sa CCLEC, usa ang gikan sa Cebu City ug usa sa LGU sa Cordova.

Ang Probinsiya sa Sugbo wala maapil sa membership subay sa orihinal nga joint venture agreement sa CCLEX.

Si Alfon nisaad usab sa Kapitolyo nga bukas ang CCLEC nga amendahon ang kasamtangang council aron mahatagan og duha ka representante ang Probinsiya sa Sugbo.