DepEd miklaro nga magpadayon ang senior high school curriculum

CEBU, Philippines — Giklaro sa Department of Education Central Visayas nga magpadayon ang Senior High School Curriculum.

Matud pa ni Dr. Salustiano Jimenez, Director sa DepEd 7 ang mga strands lang ang giwagtang aron makuhaan ang load sa mga tinun-an ug nakatutok sila sa ilang mga pilion.

Dugang pa ni Jimenez, motaas ang higayon sa mga tinun-an alang sa ilang emersion nga daku og bintaha aron sila ma-hire sa mga kompaniya.

Ang mga tinun-an mahatagan usab og NC2 Certificate diin makuha nila nga libre ang assessment, kini kabahin sa gipalambo nga Senior High School Program.

Gitug-an ni Jimenez, ang mga magtutudlo kinahanglan usab ipaubos sa pagbansay-bansay alang sa mga gipatuman nga kabag-ohan.

Samtang opisyal nga gipirmahan ni Presidente Ferdinand R. Marcos Jr. ang usa ka balaodnon nga nagdeklarar sa Mayo 16 isip “Education Support Personnel Day” ug nagtakda niini nga special working holiday aron pagpasidungog sa non-teaching personnel.

Ubos sa Republic Act (RA) 12178 nga gipirmahan ni Marcos niadtong Abril 15, ang Department of Education (DepEd) ug Commission on Higher Education (CHED) ang gitudlo nga lead agencies sa pagpangandam ug pagpatuman sa tinuig nga programa sa mga kalihokan alang sa pag-obserbar sa National Education Support Personnel Day.

Sumala sa taho sa Philippine News Agency (PNA), ang RA 12178 naghubit sa mga education support personnel isip mga indibidwal nga nagtrabaho sa mga teaching-related o non-teaching positions sa bisan unsang publiko o pribadong eskwelahan, kolehiyo, unibersidad o uban pang institusyon sa edukasyon.

Naglakip kini sa teaching assistants, registrars, librarians, doctors, nurses, division counselors, counselors ug counselor associates, guidance counselors, psychologists, clerks, ug ang uban nga mga propesyonal, administrative, technical ug general staff nga naghatag suporta sa mga tinun-an ug mga teaching personnel.

Ang mga head sa national government agencies, government-owned or -controlled corporations, local government units, ug private sector employers nga nalambigit sa edukasyon giawhag sa pagtugot sa ilang tagsa-tagsa ka mga personahe sa pag-apil sa aktibidad nga ipahigayon sulod sa ilang tagsa-tagsa ka mga buhatan o establisamento.

Ang budget nga gikinahanglan sa pagpatuman sa RA 12178 maapil sa tinuig nga General Appropriations Act. (BANAT NEWS)