NFA rice nga tag P20 ang kilo alang lang sa mga hayop?

CEBU, Philippines — Nadismaya si Agriculture Secretary Francisco Tiu Laurel sa pagkwestiyon ni Bise Presidente Sara Duterte sa kalidad sa bugas gikan sa National Food Authority (NFA) nga ibaligya sa tag P20 matag kilo.

Human sa pag-anunsiyo sa roll out sa Visayas region gisaway ni Duterte ang maong programa ug nagkanayon kini nga ang presidente naghatag lang og false hopes sa katawhan sanglit ang barato nga bugas dili angay kan-on sa tawo apan alang lang sa mga hayop.

“With all due respect to the Vice President, the Department of Agriculture (DA) family is deeply hurt by her suggestion that NFA rice to be sold is ‘hindi pang tao, pang hayop”, matud ni Laurel kinsa mao usab ang nangulo sa NFA Council.

Ang DA chief nagkanayon nga ang rice program usa ka importante nga elemento sa pagtuman sa saad sa kampaniya ni Presidente Ferdinand Marcos, Jr. niadtong tuig 2022 nga nagtinguha nga mamenosan ang pinansiyal nga kalisdanan sa mga pamilyang Filipino ilabi na kadtong sakop sa marginalized sector.

Matud ni Laurel nga subay sa balaod ang NFA obligado nga mopalit og humay gikan lang sa mga lokal nga mag-uuma ug agi'g suporta sa lokal nga agrikultura ug ang pagtawag niini nga pagkaon alang sa hayop nagpasipala sa taas nga kalidad sa humay nga gigama sa mga kugihang Filipinong mag-uuma.

Nunot niini, nanawagan siya sa Bise Presidente nga ipadaplin ang mga kalahian sa politika ug magtinabangay uban sa DA aron tubagon ang adlaw-adlaw nga mga kalisdanan sa mga ordinaryong Filipino.

Samtang, sa usa ka press conference gipanghimakak ni Presidential Communications Office Undersecretary ug Palace Press Officer Claire Castro ang pasangil ni Duterte nga ang maong programa usa ka politikanhong maniobra aron palig-onon ang senatorial slate sa administrasyon sa dili pa ang eleksiyon.

Dugang ni Castro nga ang Visayas gipili nga pilot region tungod kay ang mga bodega sa NFA sa rehiyon adunay sobra nga stocks ug ang lokal nga opisyales andam nga mokooperar sa maong programa.

Subay niini, ang Commission on Election nitugot sa agriculture department sa roll out sa programa sa P20 nga matag kilo sa bugas basta walay electoral candidates atol sa implementasyon niini.

Ang Comelec Omnibus Election Code nagdili sa pagpagawas og pundo sulod sa 45 ka adlaw sa election day paglikay nga dili maggamit ang state resources sa pagpangamgpaniya sa mga kandidato.

Dugang sa Comelec nga ang proyekto sa gobiyerno kalabotan sa social welfare ang nahatagan og exemptions atol sa 45 day spending ban. BDB BANAT NEWS