Dalagita gihubog, gilugos sa duha

CEBU, Philippines — Duha ka mga lalake diin ang usa nila menor de edad ang napaslak sa prisuhan sa Mabolo Police Station 4 Cebu City Police Office kay gipasanginlan nga miamung-among og menor de edad diha sa Barangay Apas, siyudad sa Sugbo niadtong Huwebes sa kaadlawon, Abril 24, 2025.

Ang mga gidakop mao sila si alyas Oscar, 25, ug ang menor de edad nga si alyas Timoy, 16 anyos, ang duha pulos residente sa naasoy nga barangay.

Samtang ang biktima, 17-anyos nga dalagita nga residente sab sa maong barangay.

Sa imbestigasyon sa Mabolo Police Station 4,  nga nag-inom ang biktima kuyog ang mga suspek ug laing usa ka lalake ug laing usa ka babaye.

Gibutyag sa biktima nga human sila mag-inom giingong gidala siya sa mga suspetsado sa abandonadong lugar.  Nisuway pa kini og sukol apan gumikan sa kahubog nawad-an kini og kusog.

Nihangyo pa kini sa mga suspek nga hunungon ilang gibuhat wala siya paminawa.

Human sa panghitabo nisumbong dayon ang biktima sa iyahang pamilya ug mi-report dayon sila sa kapulisan.

Sa follow-up operation sa mga sakop sa Mabolo Police Station nadakpan dayun ang mga suspetsado.

Giandam na ang kasong ipasaka batok sa mga suspetsado samtang ang biktima ipaubos sa stres de briefing sa Barangay ug DSWD.  IBM BANAT NEWS