P77.5 milyong illegal drugs nasakmit sud sa 100 adlaw ni Figueroa

CEBU, Philippines — Sulod sa usa ka gatus ka adlaw nga pag-asumir ni Police Colonel Enrico Figueroa isip Acting City Director sa Cebu City Police Office sukad niadtong Enero 11, 2025 moabot sa P77.5 million nga balor sa drugas ang nasakmit sa kapulisan sa pagpatuman nila sa anti-criminality campaigns.

Nakapahigayon ang Cebu City Police Office og 671 city-wide anti-drug operation nga miresulta sa pagsakmit sa 11,409.38 grams nga shabu nga nagkantidad og P77.5 million ug 756 ka drug suspects ang nadakpan.

Hugot sab ang kampanya sa CCPO batok sa illegal nga drugas diin 586 ka tawo ang nadakpan sa 307 ka managlahi nga operasyon.

Wala sab molugak ang ilang operasyon batok illegal firearms tungod kay 142 ka loose firearms ang nakompiskar, 170 ka armas ang boluntaryong gi-surrender alang sa safekeeping samtang giproseso pa ang expired licenses.

Duna say nasakmit nga mga explosive device sa maong period.  Samtang  malampuson sab nga nadakpan sa CCPO ang 297 ka wanted persons.

Ang hihungusgang implementasyon sa Oplan Bulabog apil ang comprehensive curfew operations napamatud-an nga epektibo sa pagprotehir sa vulnerable individuals.

Malampuson nga na-rescue sa CCPO ang 6,350 minors sa 23,044 ka indibidwal nga nasusi. Ang maong operasyon naglangkob sa pagbisita ug assessment sa 69,672 business establishments.

Naka-issue sab og 510 citation tickets sa kalapasan sa local ordinances sama sa littering, pagpanigarilyo ug pag-inom sa pampublikong lugar.  Sa comparative analysis sa crime data gikan sa January 11 hantod sa April 22 sa 2024 ug 2025 nikubos og 25.51 percent ang overall crime rates.

Nabantayan sab ang reported eight focus crime sama sa murder, robbery, theft, homicide, rape, physical injury, ug car theft nikunhod gikan sa 243 sa first quarter sa 2024 ngadto sa 181 sa first quarter sa 2025. 

Ang pagdugang og Police Stations 12 ug 13 nakadugang sab sa mas paspas nga pagresponde sa bukirang mga barangay ug seguridad sa mga molupyo didto.

Gipalambo nga night patrol operations dako sab og papel sa pagpakgang sa krimen.   IBM BANAT NEWS